:: آخر الأخبار ::

by

7404043thc.jpg

أمس بالليل عطست عطسات ,, جعلت خشمي محمرا
واليوم أكملت مسيرة تلك العطسات ,, فأصبح وجهي محمرا وعيوني تدمع
حدّي تعبت ,, تمنيت إني في البيت على فراشي
وفكرة الشردة من الدوام تراودني هههههههه

::
::

قعدتي على مكتب وحدة وفلسفتي في محافظتي على شاشة محد يشوفها غيري
كانت مجازفة كبيرة ,, لأنه المكيف مرّة على راسي وأهم شي على خشمي
وانتقالي اليوم للمكتب المجاور .. ماغير من الواقع شيء
أعتقد أني أستحق هالشي بـ سبب الفلسفة الزايدة ههههههه

::
::

تيلفوني الساعة عشرة يرن
“دينك يبا في أعناقنا باقي لـ يوم الدين ,, حبك يبا في قلوبنا ما تبدله السنين”
>> نشيدة العفاسي يبا
طبعا عرفت أن الرنة لأبوي ,, يطلبني بالرقم السري للكمبيوتر !!
استغربت تواجده في البيت ولما سألت
اكتشفت أن الوالدة سوّت حادث اليوم الصبح والحمدلله ماصار فيها شي
دعمتين من ورا بـ سبب غلط ما فهمت اشلون
اعتقد الشرح مع تحريك الأيادي في هالمواقف يسهّل الفهم وتوصيل المعلومة

::
::

انتابني إحباط من قلة الردود على موضوع آباء وأبناء
يمكن لأني توقعت يلقى جماهيرية كبيرة أو شي من هالقبيل!!
أعتقد السبب في طول الموضوع .. بس إلى الآن أشوف انه يستحق بالرغم من طوله

::
::

سيقام حفل عشاء فاخر يوم الخميس القادم على شرفي في عزبتنا ههههههه
لاحظوا فاخر وفي عزبتنا ههههه
السبب هو طبعا تعييني ونبعد عيون الحسّاد اللي همهم يعرفون كم الراتب ههههه

::
::

أمس دقيت على ربيعتي وطوّل سكرت ورديت دقيت
قالت مشكلة قوم الـ خط يدقون على أهل المدفوعه رنّه
هذا وانتي تشتغلين الحين ههههههههه
شكلي بـ نذل على هالوظيفة
والله الراتب ما بينزل إلا والعيون كلها تحوم حواليه

::
::

أصعب شعور لما يكون الواجد ضايع في الطوشة
وبعد صعب لما يبى يسوي شي ومو عارف شو وكيف وليش؟
وصعب لما تنهي شغله وتخلصها وعقب تقول نقصّت هالشي وهالشي
أو ما انهيته بالطريقة الصحيحة أو استعجلت على هالشي!!

::
::

شو بعد ,, هيه اليوم أول أبريل
ديروا بالكم أحد يقص عليكم
أنا مو من مأيدين هالنوع من الكذب ولا أحب أكذب
بس مو كل الناس نفس تفكيري وممكن أحد يسوي فيني مقلب
ولو إني أشك أنه أحد بدا فيني مقلب من أمس
بس الحقران يقطع المصران هههههه

::
::

بسني قرقة >> كلمة كويتيه بس أحبها موت
انتهت النشرة الأخبارية هههه

5 تعليقات to “:: آخر الأخبار ::”

  1. عابر سبيل Says:

    الحمدلله على سلامه الوالدة🙂
    أذكر أنني أصبت بالزكام مرتين وربما لن تكون الأخيرتين، وذلك بسبب مكيفات المكتب !!!

    بما أنكم جدد في الوظيفة اطلبوا تغيير المكان !

  2. radar Says:

    يرحمكم الله ……. وألف سلامة على الوالدة

    تم تعيينك ؟؟؟!!!! الله الله ، كم الراتب ؟؟؟؟!!!!! ……….هههههه
    مليون مبروك

    البوست السابق ، لا أخفيك طويل فعلاً ، لكن سأحاول قراءته بتمعن

    في آمان الله

    رادار

  3. عيون الحب Says:

    عابر سبيل

    الله يسلمك يارب
    من ناحية التغيير أعتقد أن هالشي راح يصير قريب إن شاء الله

    ::
    ::

    رادار

    الله يسلمك يارب
    هههه الراتب هذا سر كبير بذل العالم عليه خخخخخ
    الله يبارك فيك

    في انتظار رايك في الموضوع الطويل ^^

  4. MissFikrah Says:

    تستاهلين سلامة الوالده ,,,,,
    والراتب اليديد ,,, هههههههه اقصد الوظيفه ,,, من قدج قام حظج …(ترا والله عم بمزح)

    هههه …

    حبيبتي بالبركه والله يبارك لج ويوفقج ان شاء الله

    وانت الله يهديج ما بغيتي تيلسين الا مجابله هالكنديشن .. يمج اجر وعافية

  5. عيون الحب Says:

    مس فكرة

    الله يسلمج يارب
    ههههههه يا هذا الراتب اللي تعبوني عليه
    الله يبارك فيج عيوني والله يعافيج

    حياج الله عيوني ^^

التعليقات مغلقة.


%d مدونون معجبون بهذه: