:: بعيداً عن البطالة ::

by

 

جزء من التحاقي في برنامج توطين (برنامج تأهيل وظيفي) ,,
كان تدريب ميداني لـ مدة 10 أسابيع
بعد إنجازي للـ مدة المطلوبة ,, وعودتي لـ فراش البطالية ,, يفاجئني اتصال هاتفي

فلانة: ألو ,, عيون الحب ,, حابين صورة من جواز السفر ,, خلاصة القيد ,, و 12 صورة!!
أنا: 12 صورة !!! ناويين تعرضون صوري في الجرايد والمجلات
>> أستعبط أونّي ما فهمت ههه
فلانة: ههههه لا عيون ,, حابين نوظفج عندنا ,, تعالي باجر وجيبي هالأوراق معاج
أنا: أفا عليج ,, ما طلبتي ههههههه

اليوم الثاني ,,

أنا: السلام عليج ,, تفضلي هالأوراق اللي طلبتيها
فلانة: عبّي هالوثيقة ,, عقب هالأوراق خذيها سوّي الفحوصات ,,

ومن تخلص الأوراق الأمنية راح نطلبج تداومين عندنا
أنا: يييييييييييييييييييييييس

بعد أسبوع ,,

img_4540.jpg

نتيجة الأمن الجنائي ,, يقول أن ماعندي سوابق جنائية هههههههه >> كنت شاكة بـ عمري

img_4543.jpg

والفحوصات الطبية ,, من دم ,, وأشعة ,, وووو عيب أقول كل شي ههههههه

 

وبعدها بأسبوعين تفريبا ,,

فلانة: السلام عليج ,, أوراقج سليمة مية الـ مية ,,
حابينج تبدين معانا من هالأسبوع ,, في انتظارج
أنا: أبشري ,, أشوفكم باجر إن شاء الله =)

تمت العملية بـ نجاح ,, شعور رائع بعد ,, سنة ,, و 9 شهور ,, و 4 أيام من التخرج ,,
أن أكتب هالموضوع أقول فيه إني أصبحت الحمدلله موظفة

 

والأروع كانت ردود فعل صاحباتي لما طرشت لهم المسج أبشرهم إني توظفت
طبعا غير رسايل مبروك وتستاهلين ,, والله يعطيج خيرها ويكفيج شرها ,,
بعض الرسائل كانت صدق قمّة في الروعة ,,

رسالة 1:

“مبروك من الخاطر ,, والله البارحة كنت بتصل فيج ,, أتخبر عن الوظيفة”
صدق هالانسانة كانت كل ما تشوف شاغر تطرشلي رسالة تقولي اسم الجريدة والصفحة
وأحيانا تعطيني الايميل تقولي راسليهم هههههه

رسالة 2 و 3 و 4:

هذي رسايل شحاته هههه
“مبروووك وتستاهلين والله ,, يا الله اتريا هدية نجاحي ”
“مبرووووووووووك تستاهلين كل خير وعقبالنا ,, هالله الله فينا بأول راتب”
“ألف مبروك نتريا الحفلة ,, طبعا في هدايا لا تخافين”

رسالة 5:

“مبروووك من الخاطر .. الحمدلله ,, وأخيرا ,, صدق فرحت جنّي أن اللي مشتغله,,
الله يوفقج وييسرلج أمورج كلها دنيا وآخره”
هالمسج صدق ونّسني ,, ان تفرح وحدة لي كـ فرحتها بـ نفسها صدق تغصصت
وهالانسانة كانت لـ مدة 4 سنوات متلازمين مع بعض في الدراسة وفي البروجكتات وكل شي

رسالة 6:

هذي الرسالة نقعت عليها من الضحك
“ألف مبروك عقبال المعرس” هههههههه

هذا غير الاتصالات الخاصة بـ سبب هالمناسبة
والله فرحت كثير ,, عساني ما أنحرم منكم يارب

17 تعليق to “:: بعيداً عن البطالة ::”

  1. female Says:

    على البركة ..
    والله يوسع عليك من رزقه ..
    🙂

  2. بنت الاجاويد Says:

    مبروووووووووووووووووووك وربي يعطيج خيرها و يكفيج شرها يارب

    وعقبال طابور البطالة الي انا وحدة منهم و الي ما توظفوا يارب

    بالتوفيق وربي يسعدج ان شاء الله

    بنت الاجاويد

  3. missmrmr Says:

    من القلب الف مبروك
    تستاهلي الخير كله : )

  4. Gdedouy Says:

    ألف مبروك خروجك من مرحلة البطالة

  5. عيون الحب Says:

    Female

    الله يبارك فيج يارب .. ويسمع منج
    سعيدة بـ زيارتج ^^

    ::
    ::

    بنت الأجاويد

    الله يبااااارك فيج عيوني
    ههههههه أخاف انتي معطلة الطابور هههه
    الله يوفقج ,, وعلى فكرة ,, تمت الإضافة *^

    ::
    ::

    missmrmr

    الله يبارك فيج عيوني
    سعيدة بـ تواجدج

    ::
    ::

    Gedeouy

    الله يبارك فيك يارب ^^

  6. عابر سبيل Says:

    مبروووك وتستاهلون كل خير
    ماشي احلى من الوظيفة بعد كل هالمدة من البطالة
    شدوا حيلكم وقدموا كل إبداع ممكن ^_^

  7. سنمار Says:

    الف مبروووووووك
    وان شاء الله ايامك كلها انس.

    بيجي يوم وتحنين لايام البطالة

  8. عابرة Says:

    أنا زعلانة ،، ليش ما خبرتيني😦

    بس بقولج

    تستاهلين الخير ،،

    إحترامي

  9. فراوله Says:

    مساالورد والجوري
    غاليتي احلا عيون
    مليوووون مبروك علي الوظيفه…وتستاهلين اكثر بعد
    وديري بالج بكل خطوه تخطينها
    تري الوظيفه تختلف اختلاف كلي عن فترة الدراسه
    دمت بحب ياحضرة الموظفه
    الجميله
    :**

  10. عيون الحب Says:

    عابر سبيل

    الله يبارك فيك يارب
    هيه والله صدقت
    ان شاء الله ماراح نقصّر!!

    ::
    ::

    سنمار

    الله يبارك فيك يارب ويسمع منك
    هو من ناحية الـ حنين هذا طبيعة الإنسان
    لما يكون الشي عنده مايريده ,, ولما ما يكون عنده يتمناه

    ::
    ::

    عابرة

    افااااا ليش تزعلين!!
    آسفين ياعمري
    وتسلمين عيوني

    ::
    ::

    فراولة

    هلا مساء الورد
    الله يبارك فيج ياحياتي
    وان شاء الله بـ دير بالي
    تسلمين على كلماتج الحلوة ^^

  11. حلمي معي Says:

    من ارض السعوديه
    لارض الامارات
    رسل باقة وروود معطره
    ونزف لك احلى التهاني….

    وارض السعوديه وسماها وبحرها
    واهلها وانا
    نقول لك
    مبرووووووووووووووووووووووووووووووووووووووووووووووووك
    مبروووووووووووووووووووووووووووووووووك
    مبروووووووووووووووووووووك
    مبرووووووووووك
    مبروووك
    مبروك

  12. shaimaa-alkandari Says:

    يه يه يه

    مبرووووووووووك

    الف مبروووووووووووك عيووووووون

    الحين صرتي موظفه الله يوفقج يارب

    يالغاليه عاد عندج سلف تسلفيييييييني ياه

    واردلج المبلغ بالاسبوع اللى مافيه يمعه

    شقلتي عااااااااد

  13. عيون الحب Says:

    حلمي معي
    من أرض الامارات
    لأرض السعودية
    نرد التحية والتهاني
    ونقول الله يبارك فيكم ويسعدكم
    ويونسكم مثل ما ونستوني
    =)

    ::
    ::

    شيوووووم

    الله يبارك فيج حياتي
    شو يعني سلف؟؟ >> خخخ شفتي الاستعباط اللي يفيد احيانا ههههه
    تسلمين عيوني
    =)

  14. المبدع العربي Says:

    مبروك اختي الكريمة التوظيف، ونتمنى ان تقومي بتغير أحد الأمور الروتينية المعتادة في الوظائف
    أخبرينا بآخر الأخبار في الوظيفة

    بالمناسبة.. لعلي لم أفهم جيداً. أين توظفتي بالضبط؟

  15. عيون الحب Says:

    أخي المبدع العربي

    تأكد أن تواجدك في مدونتي يعني لي الكثير الكثير
    الله يبارك فيك يارب وإن شاء الله توظيفي يكون باب لأمور غير اعتيادية

    أما عن سؤالك عن المكان!!
    فـ أنا من الأساس لم أذكره ولم ألمّح لأي شي في الموضوع
    بس مسماي الوظيفي “منسق تقنية معلومات”

  16. ensaaaan Says:

    باقة من الورود الزاهية ذات العطور المنتشرة في أجواء السعادة تعبر عن فرحة وكلمة تقال دائماً في مثل هذه الأمور الا وهي مبرووووووووووك ” مع العذر الشديد في التأخير ” والسبب أكيد معروف.

    عقبال الترقيات لإعلى المناصب ولا تنسينا تراك واسطة ما نستغني تعرفين أهل الخليج أهل الواسطات.

    تحيــــاتي ..

  17. عيون الحب Says:

    تسلم أخوي على الباقة وواصلة حتى لو متأخرة
    الله يسمع منك ولكن نحن لا نطمع لهذا كله الحين
    مشوار الألف ميل يبدأ بخطوة
    ما أريد أبدأ بالتفكير من الحين بالترقيات وأعور راسي
    وما أنجز شغلي بالصورة اللي ترضيني وترضي رب العالمين

    حياك الله ^^

التعليقات مغلقة.


%d مدونون معجبون بهذه: