:: أطفالنا أحبابنا ::

by

b0597144341.jpg

السلام عليكم ورحمة الله وبركاته

لما وصل عمر أخوي الصغير لـ 4 سنوات ,, كان بعده شديد التعلق بـ أمي وبالبيت
فـ كانت أمي توديه الروضة يبكي بـ شكل لين ينكسر خاطرها عليه وترجعه
لـ مدة أسبوعين وماشي فايدة ,, لين قعد عن السنة الأولى من الروضه

جت السنة الثانية ,, انعاد نفس الموال ,, قالت حرام يبكي وعور قلبي ووووو
ونحن نحاول نقنعها وحرام عليج ,, تعليمه ,, دراسته ,, وهتافاتنا راحت سدى
وزين بعد ما طلعت أرواحنا ,, دخل أول ابتدائي ,, بـ مساعدة أختي اللي راحت معاه
وقسّت قلبها ,, بدل أمي اللي كل يوم ينكسر خاطرها على ضناها

كنت طول هذيك الفترة أشوف أمي على خطأ ,, ويمكن لين الحين
لأنها حرمته من سنتين روضة يتعلم فيها كثير ,,
بس تصدقون ,, لما تفرغت من دراسة الكلية وصار أخوي مسؤوليتي
حسيت بـ احساس أمي ,, لأني كنت أدرسه ,, وأكلمه ,, ويحكيلي شو صار في المدرسة
ولما نقلته مدرسة نموذجية ,, كنت أطل وأزوره عشان أشوف مستواه
كنت أشوف كيف شقاوة الأولاد ,, وكيف صدق في أطفال أعوذ بالله منهم
الشر طالع من عيونهم ,, والوجود خرايط من كثر التشميخ اللي فيه هههههه

ساعتها انكسر خاطري على أخوي ,, وحسيت بأمي لما كان يعورها قلبها
كنت أخاف يجي أخوي يوم يشكي من أحد ,, ولما كان يقولي واحد ضربني من غير سبب
انقهر ,, ويكون ودي أروح أصفع الولد ,,

أف مرة ولد جيرانا ,, عض أخوي في ظهره ,, والله نهش لحمه
كرهته كره العمى ,, من يومها لما أشوفه ودي أعضه
أخوي دخل البيت يبكي تقولون أحد مات عنده ,, واللحم والله طلع من قوة العضه
كل ما يجي يدق الباب يبي يلعب مع أخوي ,, اقوله انقلع بيتكم قبل ما أرتكب فيك جريمه هههههه

الحين ,, انتوا لو جاكم ولدكم ,, أخوكم ,, ولد أخوكم ,, المهم طفل صغير في البيت
يبكي من المدرسة او من الشارع وقالك انه فلان ضربني ,, شو بتكون ردة فعلك؟
وشو راح تقول لـ هالصغير يسوي؟؟

يعني أحيد أبوي مرة قاله ,, اللي يضربك أضربه ,, وكسّر راسه بعد ههههه <<< بيطلّع أخوي خريج سجون
بس والله صدق ,, شي يقهر ,, شو بتقول للولد؟
ولاحظوا لو الطفل ما تعلم يدافع عن نفسه من صغره ,, بيتم طول عمره ينضرب ولا يضرب

تخيلوا معاي الموقف ,, هالطفل راجع بـ خريطة دم في وجهه ,, ولا عاهه مستديمه
شو بتكون ردة فعلكم .؟؟ وشو أول نصيحة راح تقولونها لها؟

9 تعليقات to “:: أطفالنا أحبابنا ::”

  1. DUBAI Says:

    : $

    عيون

    لا تعورين قلبي !!

    أنا يوم أشوف أي طفل .. أشعر بالفرحة ..!!

    دخيلج لا ترمسين عن أشياء حزينة تخص الأطفال ..!!

    : (

  2. radar Says:

    حدثت معي كثيراً ،
    إخوتي الصغار ، حينما يحدث معهم موقف مشابه ، أرسل أخي الأصغر مني بقليل ، وهو كفيل بأن يجعل الفاعل يخاف حتى من الاقتراب من المدرسة ….. ههه

    لا أطيق أن أرى أحد يؤذيهم ، وإن حدث فـ ………… ياروح مابعدك روح

  3. عابر سبيل Says:

    يمكن تختلف، يعني أنا كانوا اخواني يقولولي اللي يضربك نتف ريشه ، أما الوالده تقولي خبرنا وإذا خبرتها تخلي أبوي يروح المدرسة للمدير أو الوكيل

    لكن بحكم تجربتي، مافي أحلى من الرد !!! لأن اللي اليهال يشوفونه دوم ينضرب يضربونه هم أيضا ولو ماسوى شي، بس من باب التقليد لأصدقائهم، أو انهم حصلوا حد ينضرب ويسكت !!!

    وجهة نظر،،

    لكن أنا من ناحيتي، إذا جاني أحدهم يبكي، أعرف السبب أول شي، يمكن تكون دموع التماسيح !!! ومش دائما أخوي أو ولدي صح كلامه والباقي غلطانين، لين أعرف الموضوع، بعدين أتصرف

  4. عيون الحب Says:

    دبي

    سلامة قلبج عيوني
    بس هذا اللي قاعد يصير في الواقع
    وهالشي اللي صدق يعور القلب انج تشوفين طفل يصيح
    بسبب ضرابه صارت في المدرسة او في الشارع!!

    ::
    ::

    رادار

    هههههه لا يكون اخوك وحش كاسر؟
    ولا زي البودي جاردات اللي نشوفهم في الأفلام هههههه
    مين يطيق يشوفهم يتأذون؟
    بس زين في من يدافع عنه
    ولو انه ممكن يتعود ومايعرف يدافع عن نفسه
    وينم عن ضعف شخصية ويتمصخرون عليه!!

    ::
    ::

    عابر سبيل

    والله هالشي يصير عندنا
    تلقى الطفل يعيش في حيرة
    أحد يقوله اضرب واحد يقوله لا!!

    وصح اذا الولد مادافع عن نفسه اول مرة
    يكون مصخرة المدرسة ,, وهو اللي دايما يتسلون فيه بالضرب ههههه

    واكيد اول ما نشوفه يبكي لازم نسأله
    ودايما نقوله فكر وتذكر اكيد سويت شي خلى الولد الثاني يضربك
    وندخل معاه في تحقيق ,, وبعدين نشوف شو نتصرف ساعتها

    ::
    ::

    حياكم الله وسعيدة بتواجدكم
    =)

  5. Sara Says:

    الله يعينكم

    هالموقف صار مرة مع بنت خالي وقالت حق ولدها اللي يطقك يماا طقه🙂

    ومهما صار فهدي شقاوة أطفاال🙂

    والله يخليلكم اخوووكم

  6. ســالم الامــارات Says:

    في مثل انقوله دوم

    الريال ااشارع يربيه ؟
    لو ما طلع وواجه من صغرة سواء ضرابة ولا اي شي بيستوي خييييخة يوم يكبر

    صدقيني الولد يتعلم الشجاعه من صغرة افضل له
    بس انتو البنات قلوبكم عصافير مادري من شو تزيغون لول

    عاد ضرابات احين يا حيه كيف لو على ايامنا !!!؟

    تحياتي

  7. عيون الحب Says:

    سارة

    هلا عيوني
    الله يعين الجميع يارب
    والله هذا يطق وذاك يطق محد بيخلص هههههه
    الله يخليج ,, ويخليلكم عيالكم
    =)

    ::
    ::

    سالم الامارات

    صح يربيه وبعد يخربه ههههه
    بس لو كان الولد متعلق في أمه من صغره
    ومو متعود عالشارع ,, كله يخاف
    كيف بيطلع وبيتعلم؟

    هيه من صغره الواحد يتعلم
    والله انتوا اللي ماعندكم احساس
    عيل يهون عليك تحصل عين ولدك طالعة بسبب ضرابه؟
    ولا راسه مفلوع ويصب دم؟

    والله الحين وقبل كله شر في شر ههههههه
    تحياتي لك ولمرورك
    =)

  8. MissFikrah Says:

    صراحة راي ما راي ابوج .. واحيدني معلمه ولد اختيه انه الي يضربك اضربه .. طبعا هو ما يقصر بس توا في الروضه .. لأن مثل ما قلتي ولا شخصيته بتتطلع ضعيفه مقدور عليه .. يمج الاولاد غير عن البنات .. .. بس بعدني احس انه من باب التربية في منظووور اخر طبعاً لازم انعلم الاولاد يردون الصاع صاعين عاد كيف انا بروحي هب مقتنعه .. اقري وخبريني

  9. عيون الحب Says:

    ههههههههههه حلوة الصاع صاعين
    انتي تبين تربين وحوش مو أطفال
    والله تحتارين
    ما تبينهم ينضربون ومايدافعون عن اعمارهم بيطلعون ضعاف شخصية
    وفي نفس الوقت ما تبينهم يضربون بيصيرون عنيفين وبيضربون الكل

    معادلة صعبة
    الله يعين بصراحة

    سعيدة بتواجدج مس فكرة
    ماننحرمش
    =)

التعليقات مغلقة.


%d مدونون معجبون بهذه: