:: صفات متماثلة ::

by

السلام عليكم ورحمة الله وبركاته

جميعنا يكره تصرفات معينة من الأشخاص الذين يتعامل معهم
سواء كانوا من الأهل ,, الأصدقاء ,, زملاء عمل ,,

وكلنا يملك أسطوانه مشروخة يرددها مرة ومرتين وثلاث
“وبعدين معاك ,, انا كم مرة قلت انه هالتصرف ما أحبه”
“يا الله طيب شو هي الأسباب اللي تدفعك تعمل هالشي؟”
“صدق تقهرني بتصرفك هذا ,, أنا ماعرف انت كيف تفكّر؟”

المضحك في الموضوع ,, هو أنه أحيانا أنت كـ شخص ترتكب نفس تلك التصرفات
بالعربي (حلوة بالعربي هههه) ,, ممكن انت مثلا تسوي نفس الشي اللي يسويه زميلك في العمل
ولكن من غير ما تدرك أو تشعر بهالشي!!

تقولون كيف!!
امممم خلينا نضرب مثال!!
مثلا مثلا مثلا ,, في ناس من النوع اللي لما تندمج في الشغل
ما تحب أحد يكلمه ,, أو يلهيه عن الشغله اللي يسويها
وانت كـ شخص ضعت في شغله بسييييطة ,, وماتقدر تكمل بـ سببه
تجي إنت يالبريء تسأل النوع المندمج

أقولكم شي ,, خلونا نفرض متغييرات ,, شكلي ضيعتكم معاي
نفرض ,, (س) الشخص المندمج واللي يكره أحد يقاطعه
و (ص) الشخص التايه ووده يسأل سؤال عشان يكمّل شغله

قام الـ (ص) البريء سأل (س) الشرير أو حرام شرير المندمج
يا (س) ممكن تفهمني ايش أسوي الحين عشان أكمل شغل؟
ولا (س) يطالعك بـ هذيك النظرة وممكن يصارخ عليك أو يجرحك بـ كلمة غير الـ طّاف (التطنيش) اللي بيعطيك إياه

ال(ص) طبعا ما حب الموقف ووده يفلع ال(س) بس ما بيده شي
المهم دبّر نفسه ال(ص)
بس اللي يضحك في الموضوع ,, لما يجي (ع) شخص ثاني ضايع
ويسأل (ص) وهو مندمج في شغله ,, ويقوم (ص) يسوي نفس ما سوا (س)!!!!

بالرغم من أنه هالتصرف ما قبله (ص) من (س) بس (ص) سواه بالضبط مع (ع)!!!
طيب كيف وليش؟؟

اممممم تصدقون هالسؤال توني أسأله نفسي!!
وقاعدة الحين وأنا أكتب الموضوع أفكر في الجواب!!
>>> طيب ليش كتبتي الموضوع هههههه

للأمانة مو كل الناس راح تسوي نفس ما سوا (ص) لـ (ع)
عن نفسي واجهت هالموقف وكنت (ص) بس لما (ع) يسألني أو تسألني
ما أسوي نفس التصرف ,, لأني عشت الموقف وحسيت شو الاحساس البايخ اللي فيه!!
بس هذا كان مجرد مثال أوضحكم كيف تكون أحيانا التصرفات متماثلة من غير ما نشعر فيها

أحيانا صدق ,, نُعامل بطريقة تضايقنا من اللي حولنا وننقهر منها
بس ما ندرك إننا نسوي نفس الشي مع شخص ثاني

وهالشي يمكن ما يكتشفه الشخص بـ نفسه
راح يكتشفه شخص عاش وشاف الموقف من الطرفين

بهالحالة ,, راح يكون (ن) اللي هو صديق ل(س) و (ص)
بحيث (ن) حضر الموقف بين (س) و (ص) وحضر الموقف بين (ص) و (ع)
والمتذمر طبعا بيكون (ص) من موقف (س) ,, بس (ن) هي اللي بتنبه (ص)
انه هو نفسه سوا نفس الموقف مع (ع)

كأني خبصتكم أكثر بالحروف
بس اقروا الموضوع مرة ثانية وبهدوء ورويّة وبتوضح الصورة خخخخخ

نرجع للـ سؤال؟
ليش (ص) سوا نفس الشي مع (ع) بالرغم من إنه ما حب هالتصرف من (س)؟

تعتقدون القهر .. والحقد .. والحسد .. عوامل تساعد في هالشي؟
أو تعتقدون هي صفات نحن نكتسبها من معاشرتنا معاهم؟ وماندركها؟
أو هل هي أحيانا تصرفات أصلا المفروض نسويها ,, بس نحن ما نتقبل لما تتطبق علينا؟

شكلي بلشت نفسي ههههه
الساعة 2:30 الفجر الحين والبيت هااااادي العالم كله نايم إلا أنا أكتب هالموضوع هههههههه

بس صدق قولولي انتوا شو رايكم؟!
ليش تعتقدون الناس تتصرف بـ نفس تصرفات غيرها بالرغم من إنهم ما يحبونها؟ أو تغيضهم؟

انتظر مشاركاتكم =)

10 تعليقات to “:: صفات متماثلة ::”

  1. radar Says:

    مع إن تلخبطت فعلاً من السينات والصادات ، لكن سأحاول و أدعي أنني فهمت .. (:

    لاشخص معصوم من الخطأ ، دائما ما نقع في الأخطاء مع أننا ندرك ذلك …

    أعتقد أن هذا يعتمد على كون الشخص من النوع الذي يغضب بسرعة أو لا ….

    من الممكن أن يحدث أمامك تصرف تكرهه ولا تعقب عليه ، لهدوء في الشخصية ، و هذا يتيح لك مراجعة تصرفاتك أيضاً بهدوء ….

    امممم …. الحكاية أصبحت معقدة فعلاً ، الله يخلي السينات و الـ …. العينات

    في آمان الله

    رادار

  2. عيون الحب Says:

    هههههههه رادار
    مو هذا اتفاقنا
    انا قلت اقروا الموضوع اكثر من مرة عشان تفهمونه
    الحين ما جاوبت على سؤالي!!!

    والمثال كان فقط للتوضيح
    السؤال ,, ليش احيانا نسوي تصرفات نحن نفسنا ننتقدها من الطرف الثاني؟
    يعني نسوي كوبي للتصرف بس مع شخص ثاني؟؟

    ناطرة ردك عالسؤال ,, واركن السينات والصادات بعيد😉

  3. radar Says:

    ” صفات نكتسبها من معاشرتنا معاهم ؟؟؟ ”

    يمكن هناك صفات متماثلة كما قلتي ،
    وربما يكون مجرد رد بالمثل لكن مع الشخص الخطأ … يعني ممكن (ص) في موقف آخر يتصرف بطريقة غير تماماً …

  4. عيون الحب Says:

    رادار

    صحيح قد يكون رد بالمثل!!
    وأكيد ممكن يكون التصرف مغاير تماما =)

    أسعدتني مشاركتك
    وحياك الله دائما
    =)

  5. barrak Says:

    انا اقول لو (س ) يصير خوش انسان ويراضي (ع) احسن له بدال شماتة (ب) و(ط) و(ز)

  6. حلمي معي Says:

    حلوه س و ص و ع
    اانا يا الله ركزت معاهم
    يوم جا ن قلت بععععد

    هههههههههههههه

    بس السبب …
    ببقولك
    من عاشر القوم 40 ليلة صار منهم
    يمكن الاختلاط يؤثر
    صح يقولون لا تصاحب الا انسان الي في خير وكرريم الاخلاق
    لان يؤثر
    ودايم انسان الي خربانه اخلاقه دايم يسؤلون منهم شلته
    لان العشره والاختلاط تؤثر على النفس يمكن من اول يوم ولا ثاني يوم يمكن بعد اسبوع ويمكن بعد سنه ويمكن بعد لحظه

    فلا تعتاشرين احد او تختلطين مع احد شفته منه تصرف مو كويس او اخلاقه مو هناك لان يمكن تتاثرين
    وهذه طبيعة الانسان التاثر

    تقبلي مروري
    حلمي معي

  7. Shaima'a Alkandari Says:

    يقولج من عاشر القوم ستين يوم صار مثلهم

    ساعات البيئه تغيرج وتخليج مثلهم حتى لو كان التصرف موشي يتغلب عليج ويصير طبع فيج وانتى موحاسه

    معادلتج دوختنى ذكرتيني بالرياضياات:(

  8. ShjoOoN Says:

    موضوعك رائع عيون الحب ..

    أنا عن نفسي أكره ماعندي لما الشخص يقلد تصرف شخص ثاني خاصةً لما يكون هذا التصرف غلط أو حس بجرح لمشاعره من هالتصرف ..

    وعشان أكون صريحة .. حصل لي تقريباً نفس الموقف وكنت أمثل الشخصية (س) وبنفس الوقت (ن)
    وأنا بطبيعتي لما اكون مشغولة غصب عني ماقدر أركز مع الشخص اللي يكلمني فلو ألح علي بالطلب أنرفز وأعصب خخخخ ويبدأ عاد (ص) يتذمر ويقول الشرهة مو عليك الشرهة ع اللي جاي يكلمك🙄 ويزعل !!

    وبالضبط مثل ما قلتي (ص) يعيد نفس التصرف اللي زعل منه مع (ع) بس عاد هنا تدخلت على اني (ن) وقلت له شفت اشلون انت تعييب ع الناس وتنتقدهم مع انك تتصرف نفس تصرفهم ؟؟

    —–
    الخلاصة وجواباً على سؤالك :

    1. أعتقد ان الشخص اللي ينتقد تصرفات الناس بدون ما يقدر سببها راح يتعرض لمواقف تجبره يتصرف بنفس التصرف اللي انتقده ويلقى من ينتقده بالضبط مثل ما فعل .. وساعتها بيقدّر موقف الشخص اللي انتقده ويقول ليتني انطميت ولا عرضت نفسي لهالموقف البايخ ..

    2. أما إذا كان التصرف اللي انتقده خاطئ ومشين 100% بنظر الجميع (مثلاً الكذب ، الخيانة ، الغش ، النميمة) وهو نفسه مقتنع انه غلط ومع هذا راح يسويه .. فمن وجهة نظري هذا انسان ماعنده شخصية ويفتقر وبشدة للحكمة🙄
    ——–

    وفي النهاية اشكرك ياعيون الحب ع الموضوع الحلو
    مدونتك رائعة🙂 اهنيك عليها

    وموفقه يارب:mrgreen:

  9. عيون الحب Says:

    برااك

    هههههههه حلوة هذي
    مو عشان (س) يصير خوش انسان
    لازم ما يسوي جي ولازم (ص) يقوله عشان ما يسوي نفس الشي مع (ع)
    عشان لا (ب) ولا (ط) ولا (ز) يتشمتون في احد خخخخخخ
    حياك الله

    ::
    ::

    حلمي معي

    هههههههه عشان توضح الصورة كان لازم هالفرضيات
    صح أكيد العشرة تأثر
    وأكيد الانسان يحاول يخالط كريمي الاخلاق واهل الطيب
    تحياتي لج ولمرورج الطيب
    =)

  10. عيون الحب Says:

    شيوووم

    تعرفين اليوم شو كنت أقول لـ ربيعتي
    العين تتعود عالشي ومع الأيام ماقامت تنكره
    فـ ما بالج بالأخلاق؟؟
    ههههههه والمخ لازم يكون دايما شغال عشان مايتعب في امور زي هذي هههه

    حياج الله عيوني

    ::
    ::

    شجوووووووووون

    انتي الأروع عيوني
    والله من يومين اشوف اسمج واقول اشحلاته لازم ازور مدونتج
    ولا اشوفج منورتني =)

    بصراحة حبيتج
    يمكن انتي اللي من صماصيم (حلوة صماصيم) قلبج فهمتي الموضوع
    ورديتي على كل كلمة انكتبت فيه

    اممممم ,, والله تصدقين فكرتج معقولة
    عدم ادراك الاسباب اللي خلت الشخص يتصرف بهالتصرف
    تخلي الطرف الثاني لا شعوريا يقلده😐

    اما عن التصرف الثاني ,, صحيح هذا اعتقد ماعنده شخصية
    عيل مقتنعة انه هالشي غلط واسويه!!

    انا اللي اشكرج على تفاعلج ومرورج الأكثر من رائع
    حياج الله ولا تحرمينا
    =)

التعليقات مغلقة.


%d مدونون معجبون بهذه: