:: سواقة حريم ::

by

السلام عليكم

أكثر شي يغيضني في فلسفة الرجل
هي الجملة المعتادة “أكيد حرمة اللي تسوق,, أو سواقة حريم”
صحيح نحن ماندرك كل شي في السيارة
ولا نعرف شو السلندر و الرنجات ,, ومانعرف نصلج البنجر وووووووو
وكلام كثير نحن مالنا علاقة فيه ههههه
بس هذا مايعطيكم الحق إنكم تقولون حرمة اكيد ماتعرف تسوق

أنا من تعلمت السواقة وخذيت الليسن في ثاني تراي
وأنا انسانة جدا منظمة وأعطي كل شي حقة في الشارع
يعني أكره من يعرقل سير كامل وكان ممكن يسّهله بـ ضربة إشارة من سيارته
أو اللي يوقف عند الاشارة في الخط سيده وهو يريد يروح يسار (أحقد عليه ههه)
المهم إني انسانة نظامية وأحاول أتبع النظم والقوانين

قبل يومين انحطيت في موقف كرييييييييه كرهت فيه نفسي
والله يسامحها أمي كانت السبب
كانت تسوق وتحاول تلف وحطت السيارة في موقف محرج
وقالت ياعيون عجزت يلا شوفي شغلج هههههههه

 hard.jpg

الموقف كان أصعب مما كنت أتصور
في الصورة الفنانة اللي رسمتها توضح كيف الموقف كان صعب
التاير اللي ورا كان ضارب الرصيف ومافي مجال ترجع ريوس
وكنت يادوب أقدر أتحرك حركة بسيطة قدّام والسبب سيارة زهرة لبنان اللي كرهته بصراحة

الحمدلله انه الشارع ماكان الاستخدام عليه كثير وماكان في الا واحد بس ورانا
يريد يعبر بس كان جدا محترم ما سمعت صوت هرن واحد منه
وماكان لازق فيني ولا وترني

المهم مع محاولات حبة قدام وحبه ورا
اشوف هندي واقف على يساري يساعدني
لفة مني ولفة مناك خرجت السيارة بعد ماطلعت روحي
كنت كارهه نفسي بسبب الموقف اللي انحطيت فيه
لإني ما أحب انحط في موقف أحد يظن فيه اني ما اعرف أسوق
أو ما أقدر أدبر عمري

قلت لأمي الله يسامحج يوم طيحتيني في هالموقف
اكيد الهندي الحين في قلبه قال “سواقة حريم”
وهذا الشي كنت اتفادى أحد يقولي إياه
في النهاية اكتشفت انه الهندي كان صاحب السيارة نفسها اللي كانت وراي
صدق شهم وحبيته ههههههههههه

مر الموقف على خير الحمدلله
بس في شي دايما اضحك عليه لما اطلع مع ابوي او أخواني
لما أحد يطفرهم في الشارع ويقولون اف و اف هذي اكيد حرمة
واشوي نتجاوز السيارة ويطلع واحد
ساعتها أموت
من الضحك واحس إني انتصرت عليهم ههههه

 وتوتة توته خلصت الحتوتة
وياشباب لا تتمصخرون ولا بتنفلعون ههههههههه

11 تعليق to “:: سواقة حريم ::”

  1. فراوله Says:

    مساالورد والجوري
    غاليتي الحبيبه
    احلا عيون
    خليهم يقولون اللي يقولونه…اوكي سواقة حريم
    بس مو طفاقة رياييل
    هههههههههههه🙂
    دمت يا احلا عيون
    :*

  2. حلمي معي Says:

    احنا في السعوديه ما نسوق
    يعني ما قد انحطيت مثل هذا الموقف
    بس راح نسووق قريبا جدااااا واولهم انا متحمسه اسوق

    بس ممكن تجينا مواقف مع السواق لان تعرفين احنا نرشده كيف يسوق لانهم يجونا مايعرفون حاجه

  3. 7OSEN Says:

    هههههههههههههه

    تبين الصراحة عيون ، الحريم مايعرفون يسوقون
    يعني يا اما تكون غشيمة بالمرة ،، يا أما ترتبك من أبسط موقف

    وطبعاً هالكلام مو على الكل لكن الأغلبيه العضمى جذي

    مثلاً أنا أصادف موقف دائماً مع الحريم أو البنات
    لما أكون الصبح رايح الدوام ودائماً مستعجل امشي على اليسار يعني الحارة السريعة وأحصل سيارة تمشي بكل هدوء وبكل ثقة على اليسار ،، طبعاً ماتدري عن العالم الخارجي شي أكبس لها أقرب منها ماتدري عني

    يعني مافي إلا إني أقولها لو سمحتي ممكن توخرين شوي

    هذا الموقف مزهقني صرت إذا شفت جدامي سيارة فيها بنت على طول أوخر عنها لأنها ما تشوف بس إللى جدامها

    واااايد مواقف خلت كل الريايل يقولون عن الحريم هالكلام
    لأنهم صج مايعرفون يسوقون

    مع أحترامي الشديد لكل النساء والبنات

  4. عيون الحب Says:

    فراولة

    مساء الفل والياسمين
    ههههه حلوة طفاقة رياييل
    عجبتني بقولها دايما للي يقول سواقة حريم خخخ
    حياج الله وسعيدة بتواصلج

    ::
    ::

    حلمي معي

    هيه والله وحليلكم
    بصراحة احساس ممتع
    بس تصدقين احمدوا ربكم ماتسوقون
    عندكم عربدة مو طبيعية ,, مادري ليش عندكم أشارات مرور خخخ
    والله يعينكم على غلاسة السواقيين🙂

    ::
    ::

    حسين

    هههههههه والله في هيك وفي هيك
    وفي رجال بعد هيك وهيك
    ههههه حلوة هذي ماتشوف الا اللي قدامها
    هذي كيف تسوق ههههههههه
    والله اذا تبي تمشي عاليسار المفروض تسرع
    ولا تروح الخط اليمين
    بس على فكرة في كثير يقهرون جي في الشارع
    الهنود والرجال الكبار في السن🙂
    وشكلك من قلب فضفضت هههههه

  5. ورق مخطط Says:

    فعلا موقف مو حلو
    بس صارت و ابشرج بتصير وايد >>> مو خوش بشارة صراحة :p
    فمالحياة سوى عدد كبير جدا من المواقف المتشابهه
    انا ساعات انحط في مواقف محرجة مثل هاذي بس ما اكون السبب
    يعني في حالات الازدحام اكثر شي نجوف الناس تصفط سياييرها بمكان غلط
    او مكان عبور بالاساس و بتالي تصير الزحمة و تصير المواقف اللي مثل هاذي
    عاد آنه في هالحالة عندي مبدأ يقول في نصه : اللي يصفط محل غلط و يسوي زحمة لا يلوم نفسه ان اندعمت سيارته خخخخ
    شكرا على البوست

  6. mahmoud751 Says:

    انا كنت هموت واحد اول ما اتعلمت السواقه ههههههههههه

    بيجري قدامي وانا عمال ادور علي الفرامل هههههه

  7. عيون الحب Says:

    ورق مخطط

    ههههههه البشارة عندي علومها من زمان
    صح اخس شي اوقات الزحمة والناس ماعليها
    وقّف سيارته وطلع وماعليه من شي
    ومبدأج يضحك ههههه
    والشكر لج عالمرور اللطيف
    لاتحرمينا اياه🙂

    ::
    ::

    محمد

    هههههههه اساسيات السواقة قبل ما تطلع الشارع
    هي تعرف وين الفرامل اول شي ههههههه
    الله ستر وماكان ضحية سائق متعلم
    حياك الله🙂

  8. ســالم الامارات Says:

    عيووون

    الحالات الي تعرفين فيها اذا حرمة الي تسوق السيارة
    معطله حركة السير
    ماشية اقصىىى اليمين
    سياارة متخدشه من جدام ومن ورا
    سيارة مافيها ااووويل ولا مااااي
    واخييرا وليش ااخرا سيارة قممممة في النظافه من الداخل اتقول قاعة عرس مب سيارة

    يابوي انتو شو لكم في البحر واهواله !!؟ والشوارع واشااراته!؟ والرصيف ومواقفه!؟

    خليكم في المطبخ ؟ في الصالون؟ في البديكير؟ في التلفوونات؟ في الطلعاات؟
    السيارات والسواقه عند الحاجه ههههههههه لول

    بليز عيون جايكيي عالاوووويل ولا تكونين تمشييين 80 بالسيارة وصلي 90 عادي ترى هههههه

    سالم الامارات

  9. عيون الحب Says:

    ههههههه ماخليت شي
    انا لو اسوق 80 بموت
    اكره الشوارع قوم 80 احس اني احبي ما اسوق ههههه
    لا بصراحة اسوق 100 وفوق تحت مايمشي عندي
    بس التهور تجيني هفّات احيانا بس عادة اقول بعيش مرة في العمر
    بعدين انا قلت قبل نحن صحيح مانعرف شغلات السيارة من داخل
    بس هذا مو معناته نحن مييييح
    وبعدين نحن لو طلعنا او نزلنا مالنا غنى عنكم يالجنس الخشن
    فـ حق شو نتعب اعمارنا ونصدع روسنا بهالسوالف دام ألو واحد ينقذ الموقف🙂

  10. خلدون - سوريا Says:

    مرحبا ريماني , أو عيون

    جميلة هي هذه المدونة فهي تظهر جانباً آخر من ريماني -ومن أي إنسان- فكل منا لديه جانب جدي وجانب مبتسم ..

    على أي حال عندما أقود السيارة -ببلدي سوريا- لا أنتقد النساء, يشعرني بعض شوفيرية التكاسي والباصات بالحزن عندما ينتقدون إحداهن مع العلم أنها تقود أفضل -وأكثر ذوقاً- منهم !

    يجب أن نعترف أنه هناك من النساء من يعرف القيادة أكثر منا نحن الرجال, ذلك بسبب أنهن أشتروا السيارة قبلنا أو لأي سبب آخر …

    سؤال آخر بالمناسبة, من قال أن كل الرجال يفهمون بقطع غيار السيارات ؟! .. أنا لا أعرف شيئاً عن هذا الموضوع ! .. لا بل كنت سأرسب في امتحان النظري بسبب جهلي الكامل !

  11. عيون الحب Says:

    هلا خلدون

    صدقت والأجمل مرورك فيها
    والله بصراحة صدق ,, في حريم ماشاء الله عليهم
    بس ماشي يملا عين الرجال ههههههه

    والله مادري هو المتعارف انه الرجال يعرفون كل شي بقطع غيار السيارات
    اكثر من الحريم طبعا

    بس لكل حالة شواذ
    والظاهر انت أحد شواذ هذه الحاله
    =)

    حياك الله ولا تحرمنا الاطلالة
    =)

التعليقات مغلقة.


%d مدونون معجبون بهذه: