:: فرحة العرس ::

by

home-sweet-home-sign.jpg

السلام عليكم ورحمة الله وبركاته

حِنّة .. عرس .. راحة .. رقص .. أغاني .. صريخ .. تصفيق ..
ربشة .. لمّة .. أهل .. وناسة .. تعب .. عروس .. معرس .. ووووووووو

أعراسنا تستمر من 3- 5 أيام
يعني أكثرها 5 أيام وأقلها 3
تبدأ باليوم اللي يسبق الحنة واللي فيها لمّة الأهل وجمعتهم
وخاصة لما يجوون من برع الدولة وفيها يكون أحيانا رقص وأكيد وناسة بشوفة الأهل

وبعدها يتبعها يوم الحنة وفيها لبس وكشخة وميك أب
وناس ولمّة ورقص وأغاني لين وقت متأخر في الليل

وبعدين إذا في راحة بين الحنه والعرس نفس الشي لمة ولبس وميك اب ورقص وووووو

وبعدها الليله الكبيرة ,, يوم العرس .. صالون ,, وحشرة .. وزحمة .. ودرب ,,
وفي صالة العرس ,, تصوير ,, وربشة ,, وأغاني ودخلة العروس وبعدها المعرس
والزفة لين البيت مع التصفيق والصريخ

وأخيرا الصباحية ,, لبس ,, ميك أب ,, ربشة .. زفة .. صريخ

كلها صارت 5 أيام تقريبا
يعني هلااااااااااك على أصول
غير التعب في فترة التسوق والترتيبات للعرس!!!
والأهم من هذا كله المبالغ اللي اندفعت خلال هالفترة

والله أحيانا أطفر من اللبس والميك أب اللي اسويه
والحمدلله اني أقتنع بالبساطة في اللبس والمكياج

يعني عادي احضر حفلة بكحل خفيف وقلوس لمّاعي وبس
ولا غيري لازم وجهها ملطّخ مية ألف لون عشان تحس انها راضية عن نفسها ههههه

في هالأيام دائما أحسد الرجال
كندورة وغترة وعقال وكان الله غفورا رحيما
ومحد بيدري اذا هالكندورة لبسها في العرس اللي قبل ولا لا ههههههه

وأحمد ربي على شي ثاني بعد
إني ما أروح إلا عرس المقربين مني فقط
لا أخت صاحبتي ولا أخوها ولا بنت عمها
إذا هي العروس كان بها
والباقي أنجبر أروح لو كانوا قرااااب حيل مني
أما بنت عم جدة أمي وبنت خالة أم جد عمي .. لا يفكرون أحضر لهم .. والله يوفقهم وين ماكانوا

وإذا لزمت أمي وقالت عيب واجب ولا مادري شو
أشوف اليوم اللي مافيه أغاني أو أروح نص ساعة وأرجع
الحمدلله إني أسوق سيارة عشان أروح وأرجع بكيفي

لما أقعد بيني وبين نفسي أفكر
أقول حرام كل هذي الأيام تروح من غير ما أسوي فيها شي
واللي يعور قلبي إني أضطر أقعد من بدايتهم لين نهايتهم اغاني * اغاني

بصراحة مافي أحلى من قعدة البيت
حيل اشتقت له في هالثلاث أيام اللي قضيتهم في عرس لوحدة قريبة مني حيل
عسى الله يهنيها ويسعدها
ويرزقنا ويرزقكم
🙂

17 تعليق to “:: فرحة العرس ::”

  1. smntomah Says:

    ما شا الله
    خمس ايام
    واجد ولا
    احنا عندنا يوم الحنا والعرس والصباحه
    وبعدين لما ترجع من شهر العسل عندنا شي اسمه زواره هذه تكون عرس مصغر تقريبا

    بس هذه الطقوس الي تحكين عنها في ديره؟

  2. فتاة الأمل Says:

    ههههههههههههه

    ضحكتيني.. أنا أحمل نفس أفكارج ما أروح إلا أعراس المقربين جداً مجبرة حتى لا يقال فلانة ما تعرف توجب الناس وفلانة ما تحب الناس..

    لكن عى قولة أخوانا واللي مقتنعة بمثلهم العرس للمعاريس والجري للمتاعيس
    🙂

  3. بابل Says:

    الله يهنى كل الناس

    وصح والله دوخة العرس دوخة

    وآنا أأيدك إن الرجل كشخته ارحم وأبسط من كشخة البنت

    بطرق الغترة والعقال والكندورة مع انى مااعرف شنو الكندورة:)

    تسلمين ياغالية

  4. shaimaa-alkandari Says:

    صدقتي يالغاليه اهي فرحه بس تعب بتعب ويبييييله تزهيبات وايده

    بس الايام هذي بسرعه تمر ولا جنج مزهبه من اشهر للمناسبه يعني كل شي بينسكب باليوم نفسه

    يبه الافراح جذي صايره ولازم نكون مع اللى نحبهم بهالايام ونكون قراب منهم

    والله يهني الكل ويرزق الكل يارب

    صج الرياييل وناسه شغلهم سرييييع ومايبيله تكاليف وايده

  5. dubai85 Says:

    المسرات ما تتعوض أيامها ..

    صح متعبة .. بس حلوة .. !

    : )

    مبروكين ان شاء الله .. !

  6. عيون الحب Says:

    smntomah

    خمسه صح كثيرة بس حلوة
    بس يعور قلبي الكم الهائل من المعاصي فيها
    اصلا هم اساسا جي حنة وعرس وصباحية
    بس احيانا يكون في يوم بين الحنه والعرس فيكون بعد ربشه هههه
    هيه نحن بعد من ترجع من شهر العسل نسوي عزيمة بس مافيها طقطقة وحشره
    بسنا خلاص لين متى هههههههه

    هذي الطقوس دارجة في الامارات بس مب الكل
    بس اكثر هالحشرة تصير للناس اصحاب الأصول اليمنية 🙂

    ::
    ::

    فتاة الأمل

    والله أريح بعد تروحين كل عرس ماله معنى هياته عالفاضي
    والبنت لا نزلت من دارها قل مقدارها بصراحة
    مو أقولج انا بعد لو لزمت علي أمي من باب التوجيب ماقدر اقول شي
    هههههههه حلو المثل حبيته ههههه

    ::
    ::

    بابل

    حياك الله أخوي
    الله يسمع منك يارب
    هيه والله ارحم بكثير كشخته
    ههههه الكندورة = الدشداشه
    والله يسلمك🙂

    ::
    ::

    شيوووووووم

    حياج الله واخيرا شفناج
    هيه والله كثير تزهيبات وتعب ولويه
    وصج والله تمر بسرعة دايما اقول شهور نزهب للعرس
    وبين يوم وليله يخلص
    والفرحة باللمة والاهل حولك بصراحة وغيرها ما تسوى
    وياحيهم الجنس الخشن شكلنا بنحسدهم هههههه

    ::
    ::

    دبي

    هلا عيوني
    صدقتي ابد ما تتعوض
    الله يبارك فيج وعقبالج

    ::
    ::

    سعيدة بتواجدكم
    وحياكم الله دايما🙂

  7. بسمه Says:

    ((((لما أقعد بيني وبين نفسي أفكر
    أقول حرام كل هذي الأيام تروح من غير ما أسوي فيها شي
    واللي يعور قلبي إني أضطر أقعد من بدايتهم لين نهايتهم اغاني * اغان))))

    نفس الكلام الي اقوله لهم ويضحكون علي

    ويقولون انتي معقده ..

    الحمدلله لقيت احد يوافقني الراي ..

    تحياتي لك مع اول مروور ..

    بروح اطالع وش عندك بعد.. في المدونه

  8. barrak Says:

    الف مبروك
    والفال لج

    اسف على التأخير

  9. 7osen Says:

    مرحبا عيون

    كيف حالج وشلونج

    انا أكتفي بالتعليق بذكر مثل عندنا يقول

    المعاريس أثنين

    والميانين الفين
    🙂

    ودمتم بحب وود
    على قولة الأخ العزيز سلوقا

  10. عيون الحب Says:

    بسمه

    لما وحدة عندي يكون اسمها نفس اسمي يقولون عنها سميتي
    انتي تفكيرج نفس تفكيري بقولج فكيرتي ههههه

    لا مو معقدة ولا يخصه
    حياج الله واتمنى تواجدج الدائم

    ::
    ::

    براك

    الله يبارك فيك
    لا تعتذر وحياك الله دايما
    بدري ولا متأخر

    ::
    ::

    حسين

    هلا اخوي
    انا الحمدلله بخير انت شلونك؟
    هههههههه حلو المثل
    كل كلامك على قولة وعلى قولة انت ماقلت شي
    حياك الله🙂

  11. ~MnO YeNSa~ Says:

    مبروك حبيبتي و عسى الله يديم كل ايام الفرح :*

  12. 7osen Says:

    هلا عيون أنا بخير الحمدلله

    عجبتني فكيرتي

    هههههههه
    حلوووة

  13. عيون الحب Says:

    منو ينسى

    الله يبارك فيج ويسمع منج ان شاء الله
    وعسى ايامج انتي بعد كلها أفراح

    حياج الله

    ::
    ::

    حسين

    الحمدلله
    ههههههه تراها نفس سميتي ههههه
    حياك الله
    🙂

  14. NjOoo Says:

    رووووعه ماشااءالله
    صح تعب بس احس غير عننااا😀

    بس فعلاً احيان تحسين انو قعدة البيت لها قيمه وتشتاقين لها🙂

    واحشتني ترى *_^

    (F)

  15. عيون الحب Says:

    هيه والله تعب
    والله قعدة البيت حلوة
    وانت اكثر حبوبة🙂

  16. قمممممممممر Says:

    احنا العرس اسبوع عيل

    كلللله رقص ومكياج
    من الحنا ا والسمره والزفه وحفلات الخال والعم والخخخخخخ والغليه وهي ليله الصباحيه عندنا في اليمن وطبعا العروس في كل يوم لبس وحفله وزييييييطه وزمبلييييطه

  17. أمل الهاشمي Says:

    والله الصراحة ماعرف ليش كل هذا التبذير في حفلات الأعراس لو عني أنا جان عرسي أسويه أبسط من البساطة هذا الزمن يتنافسن الحريم في حفلاتهم إلا الكوشه ولا الفستان ولا هدايا التوزيع ولا العروس ماخلت في السوق شي ماشترته كأنها إذا اتزوجت بيحطونها في السجن ومابتقدر تطلع عطورات وكلها تخترب وريحتها تروح وملابس آخر شي توزعها على خواتها ومن غير النعل والشنط خخخخخ الله يعين الشباب والله لو نفكر ترى الدنيا لحظة وكل هذا زايل صدقوني البنت الي ماتثقّل على نفسها يكون عرسها مريح وبسيط وإليّ اتعب نفسها بالمراكض آخر شي ما ترضى ليلة عرسها

التعليقات مغلقة.


%d مدونون معجبون بهذه: