:: كنت وصرت ::

by

السلام عليكم ورحمة الله وبركاته
انتهى الشهر الكريم .. شهر الخير والمغفرة

هالشهر من هالسنه بالذات
أقدر أقول إنه رمضان كان علي غير عن كل مرة

عشت أكثر سنين حياتي الرمضانية في ساحة المدرسة أو الكلية
في كل سنه كنت أتمنى أعيش رمضان من غير جو دراسي
بـ سبب الضغوطات اللي كنت أواجهها وتمنعني من روحانية هالشهر الكريم

سنة 2006 كانت أول سنة لي قضيت رمضان بعيد عن الدراسة
أذكر أن الضغط اللي حسيت فيه سنة البكالريوس منعني من
إني أتدبّر عدل في القرآن وكان أول سؤال نسأله بينّا البين في الكلاس
ها بشري أي جزء وصلتي؟! والكل كان يبدأ شكاوي صعوبة الدراسة اللي منعتنا من القراءة

كان رمضان 2006 شيء كبير بالنسبة لي
الأمنيات اللي كنت أتمناها كل سنة وما أحققها في رمضان
الختمات اللي كنت ودي أختمها في كل رمضان وما أقدر عليها
العبادات اللي كان ودي استشعرها وأكثّر منها
كل هالأمور كان هدفي أحققها في هـ الرمضان الأول اللي قعدته في البيت

بس للأسف .. الهمّة كانت حيل كبيرة وقوية علي
بديت بـ قوّة وما تدرّجت .. ضغطت على عمري كثير
وهذا أكبر غلط يسويه الشخص لأنه مع الأيام يتلاشى وقد يموت
وانتهيت بـ إني ما ختمت غير ختمه واحدة وبديت في نص ختمه وماخلّصتها

تعلّمت من تجربتي قبل وما تمنيتها تتكرر هالرمضان
مجرد معرفتي إن رمضان بالنسبة لي إجازة من توطين (كورس تأهيل وظيفي)
خلاّني أنوي أعدّل غلطة العام لأني ما أضمن أحصّل فرصة مثل هذي مرة ثانية

خليني أقولكم شو كنت معتادة أسويه في رمضانات قبل
وشو صرت أسوي في هالرمضان

:: 1 ::

كنت معتادة أتابع على الأقل مسلسل أو اثنين في رمضان

وصرت ما أتابع ولا مسلسل (إلا آخر 6 حلقات من باب الحارة السبب أمي(

:: 2 ::

كنت معتادة أقرأ القرآن بسرعة من غير تدبّر لأختم أكثر من ختمه
صرت أقرأ القرآن بـ تمعّن أكثر وانتبهت لأمور كانت غايبة عن بالي

:: 3 ::

كنت أصلّي التراويح في الأيام الأولى من رمضان وأهملها في آخرها
صرت الحمدلله ما أطوف تراويح يوم واحد

:: 4 ::

كنت ما أقوم للسحور لأني الحمدلله ما أجوع أو أعطش
صرت أقوم حتى لو أشرب ماي بس عشان السنّة

:: 5 ::

كنت ما أقرأ شيء غير القرآن في رمضان
وصرت أقرأ مواضيع دينيه والله يجزي من كان السبب وفي ميزان حسناته إن شاء الله

:: 6 ::

كنت ما أصلّي السنن الرواتب ولا الشفع والوتر ولا قيام الليل
صرت أصلّيهم إبتداء من رمضان وبواظب عليهم دائما وأبدا إن شاء الله

:: 7 ::

كنت أروح السوق ولو مرة وحدة لأغراض العيد في رمضان
وصرت أشتري أغراض العيد قبل رمضان عشان ما أطلع السوق

:: 8 ::

كنت أضيّع وقتي بـ توافه الأمور
وصرت أحاسب نفسي على كل دقيقة شو سويت فيها وكيف ضاعت وليش؟

::
::

سبحان الله رمضان هذا كان بـالنسبة لي غيير من نواحي كثييرة
صارت فيه أمور وقصص وحكايا ماصارت لي من قبل أبد
عشت فيه يوم بـ يوم والحمدلله حسيت بـ طعمه غير عن كل سنه
يمكن لأن نيّتي كانت فيه غير واحساسي كان روحاني أكثر
الله أعلم

::
::

انتظروني مع قصصي الرمضانية الكثيييرة
الله يعينكم على سوالفي ما راح تخلص لوول

 

19 تعليق to “:: كنت وصرت ::”

  1. فتاة الحزن Says:

    الله يثبج ويثبتنا ويهدينا لصراطه المستقيم ..
    ويوفقج لكل خير..

    لا تنسين بعد إنج صمت عن التدوين

    🙂

  2. SHAHAD Says:

    الحمدلله .. الله يثبتج وإن شاء الله على طول جذي مو بس برمضان
    جد ما تستشعرين بحلاوة رمضان إلا بالعبادات
    ربي يوفقج حبوبة
    وإن شاء الله دوووم جذي وأحسن : )

  3. Mamloo7a Q8ia Says:

    الله يتقبل منا ومنج ويثبتج ويقويج على نفسج

    ان شاء الله على طول يا رب

  4. اجار الدين كشمش Says:

    يالله القبول

    انشالله

    وعيدج مبارك

    ننطر قصصك

    لا تتأخرين

    نبي نعرف رمضان

    اهلنا في الامارات

    في امان الله

    الكويت ..

    منطقة
    البستوق..جادة

    السطوح

    اخوكم .. اجار

  5. الوعد Says:

    ماشاءالله

    الله يثبتك ويزيدك من فضله

    حلو الانسان يطور ذاته للأحسن

    بارك الله فيك أختي

    سلامي لك

  6. Selezya Says:

    تقبله الله منج يارب وعسا دووم على الحال واحسن

    🙂

  7. Aldenya Says:

    سبحان الله
    وين كنتي و وين صرتي
    أستانس وأفرح
    يوم أقرا أو أعرف
    إن إنسان أقدم على تغيير كبير بحياته
    وكل هذا
    قربا لطاعة الرحمن
    الله يثبتج يالغالية
    وإستمري على هذا المنوال
    ربي حافظج إن شاءالله دووم

  8. Shaima'a Alkandari Says:

    خير ماعملت به غاليتي
    الله يثبتج يارب ويثبتنا معاج
    ويرحمنا ويغفرلنا ويرشدنا لطريق الصواب
    ان شاءالله تكون الاعمال هذي بكل وقت ونواضب عليها اجمعين

    :::

    الخط صغير عندي مادري يمكن بس عندي

  9. nadeyah Says:

    الله يثبتج ان شاء الله حبوبه

    شوفى انا من اشتغلت وجربت الصيام مع الدوام والتعب حسيت بقيمه الاجازه وجربتها اخذ العشر الاواخر اجازه عشان صلاه القيام والعبادات على راحتى واقدر انام شوى ولله الحمد استمريت على جذى والسنه هذى خذيت كل رمضان وايد اريح بدال لا اضيع وقتى بالطريج والزحمه وخاصه انى اتعب بالصيام فالحمدلله مرتاحه جذى والسنه صليت مرتين بالمسجد الكبير ويعتبر انجاز شعور رائع وخشوع وتبارك الرحمن اول مره يمكن 25 الف والمره اللى وراها عدينا ال 30 الف شنو احساس رووعه بس زحمه واللله والباقى بمسيديمنا ولله الحمد

    وايد طولت بالبوست عليج سورى والسموحه على قولتكم

  10. 5roofa Says:

    ربي يخليج على هالحال و يثبت يارب

    مشالله عليج عيني عليج بارده يارب دومز

    صج عيون حبيبتي انا فهمت انتي شنو قصدج على بلوقي لمه سالتج من وين تسوين انتي خلفيات بلوقج

    سامحيني اذيتج معاي

    😀 salamz sweetee…

  11. 7osen Says:

    الله يعطيج العافيه على هالتغيير هذا

    الإنسان إللى يقدر يغير نفسه للأحسن
    إنسان مميز وقوي

    صراحة واايد عجبني كلامج
    حسيت فيه قوة وإرادة إيجابية كبيرة

    تحياتي لج

  12. عيون الحب Says:

    فتاة الحزن

    الله يسمع منج يارب
    ويوفق الجميع ان شاء الله

    صحيح صمت عن التدوين
    بس للأسف ما صمت عن الانترنت

    شكلي الفترة القادمة بصوم عنه
    الادراك وصل متأخر

    ::
    ::
    ::
    ::

    شهد

    هلا حبيبتي
    الله يسمع منج ويثبت الجميع ان شاء الله
    اي والله رمضان من غير عبادات
    واحساسيس تتحرك في قلبج من داخل
    ما يكون رمضان

    ان شاء الله ودعواتج
    🙂

    ::
    ::
    ::
    ::

    مملوحة كويتيه

    الله يسمع منج يارب
    اشكرج عالدعوة الحلوة
    جد جد احتاجها
    الله يهدينا ويهدي الجميع ان شاء الله
    جزاج الله خير وحياج الله
    🙂

    ::
    ::
    ::
    ::

    اجار الدين كشمش

    ارحب بمرورك الأول في مدونتي
    والله يسمع منك يارب
    والله يبارك فيك

    وان شاء الله قصصي على وصول
    بس يبيلك حبتين صبر
    ورمضانّا مايفرق عن رمضانكم
    وفي النهاية انا بنوته ومكاني في البيت يعني ما اعرف قصصي ما اعتقد راح تعكس جو رمضان عندنا
    🙂
    حياك الله واسعدني مرورك

  13. عيون الحب Says:

    الوعد

    حياج الله في مدونتي
    والله يثبت الجميع يارب
    وتصدقين حلو التطور للانسان من نواحي عديدة
    الانسان لازم يقعد مع نفسه دوم ويشوف شو ينقصها عشان يطورها

    الله يبارك فيج يارب
    وحياج الله
    🙂

    ::
    ::
    ::
    ::

    سيليزيا

    ياهلا فيج
    الله يسمع منج وتسلمين عالدعوة الحلوة

    🙂

    ::
    ::
    ::
    ::

    الدنيا

    هيه والله وين كنت ووين صرت
    تعرفين شو الأروع من هذا كله
    الشعور في داخلج بالرضا
    وسعيج للبذل أكثر
    وأحلى شي التخطيط اشلون اسوي جي
    وكيف أتدارك هالشي ووووو

    انا استانس اكثر لما ادرك انه هالانسان اللي قاعد يتغير هو أنا
    الله يسمع منج ويثبت الجميع
    ان شاء الله راح استمر
    ودعواتكم
    🙂

    ::
    ::
    ::
    ::

    شيوووم

    الحمدلله انه الله هداني لهالشي
    الله يسمع منج يارب
    وان شاء الله دوم يرشدنا للطريق المستقيم
    وان شاء الله نواضب عليها

    اي عيوني حطي الخط وسط من
    view–> text size –> medium
    هذا الخط المناسب لكل المواقع
    🙂
    وحياج الله

  14. عيون الحب Says:

    نادية

    الله يسمع منج يارب
    سبحان الله يقولج ما تحسين بقيمة الشي الا بعد ما تفقدينه

    والحمدلله لحقت ادرك رمضان بروعته في الاجازة هذي وان شاء الله دوم اشعر بهالاحساس

    وافا عليج دام السوالف منها فايدة وعبرة لازم نكثّر منها بعد

    مسموحة وحياج الله
    🙂

    ::
    ::
    ::
    ::

    خروفة

    الله يسمع منج ان شاء الله
    ان شاء الله الجميع جي ودوم بعد مو يوم

    لا عادي افا عليج الخلفيات تحصلينها كثير بالنت واذا تبين اي خدمه
    عيوني لج
    🙂

    ولا اذيه ولا شي
    يسعدني اكون بالخدمة
    🙂

    ::
    ::
    ::
    ::

    حسين

    الله يعافيك يارب

    بالعكس انا في نظري الانسان اللي يحافظ على هذا التغير
    ويظل يسعى للأفضل
    ويطبق أي فكرة خطرت في باله لصالحة طبعا هو الانسان المميز والقوي

    أنا لين الحين أقول انه ارادتي جدا ضعيفة وطموحاتي كثير كبيرة

    لما انجز نص من طموحاتي تقريبا
    اقدر اقول اني نوعا ما قوية

    ولما انجزها كله ساعتها اقول عن عمري مميزة وقوية بعد

    العجيب كلماتك التشجيعية والله
    ماتدري شكثر اسعدتني كلماتك وعطتني حافز ودفعة كبيرة للأمام

    جزاك الله خير
    🙂

  15. esTeKaNa Says:

    ما تتخيلين شكثر فرحت يوم قريت هالبوست،تذكرت كلامج ل يقبل رمضان يوم قلتي انا ودي ما انشغل عن رمضان بشي،وفعلا حققتي هدفج ورتبتي امورج بشكل جميل
    🙂
    علامه قبول العمل الصالح ان الله يوفقك لعمل صالح بعده،اوتمنى يكون رمضان هذا فاتحة خير عليك تتعودين بعده على المحافظة على السنن الرواتب ووقيام الليل ولو بثلاث ركعات
    ما تتخيلين شكثر ركعات الليل تريح سبحان الله
    الله يثبتج ويوفقج ويسعدج دنيا وآخره يا الغاليه :**

  16. 5roofa Says:

    تعطيني الموقع الي انتي حصلتي منه ماعليج امر
    مشكووره يالغاليه

    😀

    salamz sweetee…

  17. عيون الحب Says:

    استكانه

    الحمدلله يااختي هذا والله فضل من رب العالمين
    والله يثبتنا ويهدينا جميع يارب

    والله يسمع منج يارب وما اقطع هالسنن وابدا في عمل صالح غيره وغيره

    تسلمين عالدعوة عيوني
    🙂

    ::
    ::
    ::
    ::

    خروووفة

    شوفي انا ماعندي موقع محدد
    اكتب في جوجل
    blogger templates

    وتطلعلي مواقع بالهبل واقعد انبش
    بس بعطيج امثله

    http://www.bloggertemplates.org/
    http://blogspottemplates.blogspot.com/

    وفي بعض المواقع تسوي دعايات لمواقع ثانية فيها ديزاينات

    انتي دوري وان ماعرفتي ردي قوليلي
    🙂

  18. عابر سبيل Says:

    أسأل الله أن يثبتكم وأن يزيدكم علما وعملا صالحا

    ودعواتكم لنا

  19. عيون الحب Says:

    عابر سبيل

    هلا اخوي
    الله يسمع منك يارب
    ويوفقنا ويثبتنا جميعا ان شاء الله
    🙂

التعليقات مغلقة.


%d مدونون معجبون بهذه: