:: ذكريات محروقة ::

by

صعب نلقى انسان قبل خمس سنين نفس ماهو الحين
الزمن والظروف والحياة غيرت في الانسان كثير كثير
غيرت فيه كل شي من طبايع إلى مشاعرصديقة تصغرني بـ سنتين
تعرفت عليها وتعلقنا في بعض وايد
انتقلت للدراسة في الكلية وهي بعدها في المدرسةبالرغم من كذا ظلت علاقتنا اوكيك
مع الايام بدا الاهتمام يقل
بس الغلا بعده موجود مع الأيام

أمس ضايقها عدم اتصالي عليها
وقالت لي اني كثير تغيرت عليها
وقلتلها ان الزمن غير فينا أشياء كثيرة ماكان ودنا تتغير
بس أكدت لها ان الغلا والمعزة في قلبي لها بعدها موجودة

هو صحيح الشعور مب نفس الشعور
والمحبة مب نفس المقدار سابقا
بس مواقف كثير في حياتنا مرت علينا
سببت فتور في علاقتنا وفراق بعض الأحيان

اعترفتلي أمس انها تصفحت صندوق ذكرياتها
واللي كان يضم عدد كبير من رسايل وقصاصات ورق مني
وقالتلي انها صدق أمس حست بالفرق الشاسع بين عيون أمس وعيون اليوم

وقالت ان الذكرى كانت كثير مؤلمة وجارحة بالنسبة لها
فكان الحل إنها تحرق كل شي له علاقة فيني
وقالت اذا كان الشي المكتوب عالورق ماله وجود في الواقع
ليش احتفظ فيه ؟

ليش احتفظ بذكرى تجرحني كل ما تذكرتها؟
ليش احتقظ بذكرى تذكرني بـ عيون ماعادت موجودة؟
اذا الزمن ما غيرني وغير احساسي تجاهج
انا لازم اغيَر نفسي عشان اتأقلم معاه

صراحتها هزتني من داخل
أنا أؤمن بأن الذكرى لو شو كانت جارحة
لو شو كان وقعها صعب علينا
بس تظل ذكرى لها نكهة خاصة في حياتنا
حتى لو صاحب الذكرى ماعاد له أي أثر في حياتنا

لو مكانها شو راح تسوون ؟
وشو هي طبيعة فلسفتكم مع الذكريات؟
::

::
الصورة من تصويري
سبق وعرضتها لمجرد فكرة
بس ربيعتي طبقتها بحذافيرها

20 تعليق to “:: ذكريات محروقة ::”

  1. ~ مذهلة ~ Says:

    تبين الصراحه راح أسوي مثلها
    يعني هي مو حاسه فيني ليش أتألم وهي مو داريه

    أكره الذكريات حتى لو إنها حلوه لاني أتمنى انها ترجع ومافيه أمل ترجع

    تحياتي لكـ

  2. عابر سبيل Says:

    أذكر مرة أننا كنا نجلس أنا وأعز صديق لي
    في أيام الدراسة
    قلت له تعرف يا فلان ، سيأتي يوم لن تكون علاقتنا كما هي اليوم
    كل منا سيتغير طريقه بعد الدراسة
    وقد يجد أصدقاء آخرين يكون تواجده معهم أكثر
    فقال لي مستحيل !

    لكن الأيام والسنين أثبتت صحة كلامي
    ولو أن ما بيننا من ود لم يتغير بل زاد
    لكن أنا أريد
    وهو يريد
    والله يفعل ما يريد

  3. 7osen Says:

    أنا أعتبر الذكريات كنز كبير
    مهما كانت جارحة أو مؤلمة

    لأنها دائماً تكون جميلة وتردنا لفتراة من العمر عشنها بكل حلوها وكل مرها

    الذكريات هو في أجمل من الذكريات

    إللى يحرق ذكرياته يكون جذي حرق جزء من حياته

    والإنسان برأيي المفروض ما يلقي اي جزء من حياته مهما كان

    وصدقيتج أكيد ما زالت تحبج وااايد لأنها لو ما تحبج ما حرقت ذكرياتج

    أتمنى إنكم ترجعون صديقات مثل اول وأحسن

  4. barrak Says:

    اللي يبينا حياه الله واللي مايبينا
    مايشوف شر

    ترى فيه ناس هواياتهم بالدنيا التشره

    صديق لي ابتدأت علاقتنا منذ 1982 الى قبل اسبوع

    فجأة بلااسباب لاسلام لاكلام
    طيب ليش
    ماادري
    على طول اجابتي له
    ماتشوف شر
    وياناس ياشر كفاية أر

  5. عيون الحب Says:

    مذهلة ..

    كيف قلبج يطاوعج تحرقين جزء من حياتج؟
    ومين قال انا مو دارية عنها؟
    عدم السؤال عن الشخص مب معناته اني مب مهتمه له او ما احبه ..

    صحيح احيانا مالها امل ترجع
    بس تذكرج بحياة قضيتيها

    كل احد له مبدأه في الحياة واحترم مبدأج🙂

    تحياتي لج🙂

    ::
    ::
    ::
    ::

    عابر سبيل ..

    صحيح اخوي عابر
    وقتها لما تتكلم وتقول
    كرد فعل طبيعي راح يقول مستحيل

    اي شخص في مكانه راح يقول هالشي
    لانه الاحساس اللي يحسبه لحظتها مايتمنى ينتهي ..

    والحمدلله انه علاقتكم لين الحين موجودة
    والله يخليكم لبعض🙂

    ::
    ::
    ::
    ::

    حسين
    حياك الله اخوي

    قبل ما تقول هالشي كنت متأكدة انك تأيدي بتفكيري
    انا بعد اؤمن انه الذكريات لو شو كانت مؤلمة فهي كنز صعب الاستغناء عنه

    صدقت والله تعتبر جزء من حياة الانسان
    يتذكر فيها كيف كان قبل وكيف تصرف وكيف عاش

    انا ما اقول انها ماتحبني المشاعر بعدها موجودة من الطرفين
    بس اللي عور قلبي انها انهيت حياة عشناها مع بعض فيما مضى😦

    حياك الله اخوي واسعدني ردك🙂

    ::
    ::
    ::
    ::

    براك ..

    ياخطير انت ياقوي
    بس بعد يعز عليك فراق انسان عشت معاه حياة حلوة

    وصح في ناس ماعندهم غير العتاب والتشره
    حرام علاقة استمرت سنين تنتهي بسبب تافه

    الله يهديه ان شاء الله وترجع الامور من بينكم اوكيك
    واخيرا مابغيت تزورني كاااك🙂

  6. Almas Says:

    مرحبا

    الناس صارت تحب تتعذرب بأي شي

    وآنا أؤمن بشئ لا يتغير مادمت أحب هذا الشخص وأعرفه ما بداخله

    إذا لا يمكن أتغير عليه

    ولازم أعذره لأنه انسان ومعرض للظروف بالحياة

    مهما الظروف تتغير والأيام تغير يظل مافي القلوب في القلوب

    لأنه هو الأساس وليس بالمحيط

  7. عيون الحب Says:

    حياج الله اختي الماس ..
    سعيدة بزيارتج والله ..

    صحيح في ناس ما تقدّر الظروف ولا تعطيها سبب للتغير ..
    وصحيح مهما الظروف غيرت فينا اللي في القلب في القلب ..

    اسعدني ردج🙂

  8. hamdool Says:

    هالموضوع فيه جزء من البوست
    الأخير اللي في بلوقي
    واللي إنتي علقتي عليه

    بالنهايه هذي ذكريات ماديه
    والذكريات المعنويه إهي الأهم
    واللي تبقى ولا تمحيها لا نار
    ولا ماي ولا غبار ولا حتى الزمن

    عندي أصدقاء كثيرين
    رغم علاقتي الشبه مفقوده
    معاهم لكن كلنا نذكر بعض بالخير
    وندري إن الظروف وحدها هي
    التي وضعتنا في هذا القالب

    ويمكن إذا حاولنا نرجع
    بالقرب اللي كنا فيه
    تنشب الخلافات ونلعن الساعه
    اللي عرفناه فيها
    وتضيع حلاوة الماضي

    الزمن يتغير
    وإذا هي إختارت حرق الصور
    فهي أخطأت بحق نفسها وليس
    في حقك

    على فكره آنا أموت عالتصوير
    بس أكره كتابة المعايدات بإسهاب
    وأفضل أكتب الكلام بإسلوبي
    ولكن بشكل عام علشان لا يصير
    اللي صار مع صديقتك

    Have a nice day

    وأبي أشوف تعليقاتك
    على الموضوعين اللي كتبتهم بالأول
    لو عندك وقت

  9. عيون الحب Says:

    هلا اخوي همدول ..
    تصدق خليتني انظر للموضوع من منظور ثاني
    الرسايل ذكريات مادية فعلا
    بس مادري انا ما احب افرط فيهم

    وتصدق صدقت لما قلت في ناس لو قربنا منهم اليوم بتصير خلافات وبنفقد ذكرياتنا الحلوة معاهم😦

    “الزمن يتغير
    وإذا هي إختارت حرق الصور
    فهي أخطأت بحق نفسها وليس
    في حقك”

    تصدق وقفت كثير عند هالجملة !!
    انا حسيتها غلطت في حقي انا بعد
    حسيت كأنها حرقتني معاها

    have a nice day too

    وان شاء الله ماطلبت ارد عليهم كلهم🙂

  10. charisma Says:

    صباح الورد عيون الحب

    الصوره وايد حلوه

    تسلم ايد من صورها
    🙂

    موضوع الذكريات عن نفسى كل ذكرى حلوه احتفظ فيها
    لى صندوق صغير فيه ذكريات وصور ومكاتيب محتفظه فيها بس كلها ذكريات سعيده
    والباجى تخلصت منه
    بس لا مفر من الذكرى
    تحملها الذاكره لو مهما شلناها بتمر علينا لحظه نذكر الماضى الاليم او الذكرى الموزينه
    :/

    وموضوع الصداقات والناس القراب منج

    سبحان الله فى ناس تلتقين فيهم وتحبينهم من قلبج بس تاخذهم الدنيا منج
    يعنى تفتر الاعلاقه
    وناس اتعرفينهم ويظلون معاج للابد
    المعزه تبقى للاثنين اكيد
    بس هيا الدنيا
    على ظروفج وعلى تمسكج وتفاعل الشخص معاج

  11. امبراطـــورة اشعاري Says:

    صباح الخير عيون الحب..

    ذكرى وللذكرى ناقوس يدق في عالم النسيان..

    الدمع قد يجف والقلب قد ينسى..

    وللذكرى بقاء..

    دع الأيام تفعل ماتشاء..

    وطب نفسآ إذا حكم القضاء..

    ولا تجزع لحوادث الدنيا..

    فما لحوادث الليالي من بقاء..

    وأرض الله واسعة ولكن..

    إذا نزل القضاء ضاق الفضاء..

    شوفي انا مع الذكرى مهما كانت.. لأنها تذكرني بأشياء حلوه صارت من قبل.. وفعلآ الأيام تاخذ مجراها بالعلاقات بس هم احنا لازم نعطي غيرنا حق فينا..

    انا عندي رسايل من صديقه من سنة 1992

    البنت هذه صارت بينا مشاكل وتدخلوا فيها اهلنا يعني صارت مذبحه ..

    بس تصدقين رسايلها للحين عندي مرات لما اتذكرها اكرهها كره العمى.

    ومرات لما اقرا رسايلها واتذكر ايام قبل اقعد اضحك..

    والله كريم كل شخص وحسب نفسه واهوائه🙂

  12. عيون الحب Says:

    كريزما
    هلا صباح او بالأصح ظهر الخير لوول ..

    الأحلى مرورج عزيزتي والله يسلمج ..

    بالنسبة للذكريات انا بعد عندي بوكس خاص فيهم وكل وحدة فاصلة ذكرياتها عن غيرها ..

    صحيح بتظل الذكرى بس يمكن مع الايام الواحد ينسى بس من يقرا الورق يتذكر الاحداث بالتفصيل

    وصدقتي والله سبحان الله
    الصداقة لها مفاهيم مختلفة
    واماكن كثيرة ..

    حياج الله وسعيدة جدا بزيارتج🙂

    ::
    ::
    ::
    ::

    هلا عيوني الامبراطورة
    ظهر الخير لول

    حلوة هالجملة
    “الدمع قد يجف .. والقلب قد ينسى
    وللذكرى بقاء”

    حتى معاها وبقوة بعد
    صحيح احيانا تحسين انج عفتي الشخص او ما تربطج به اي علاقة بس ذكرياتج معاه تظل لها نكهة خاصة ما تقدرين تستغنين عنها

    حياج الله عيوني🙂

  13. عثماني Says:

    مساج الله بالخير اخيتي الغالية عيون الحب

    الزمن شي طبيعي يغير الناس … المسؤوليات تزيد و الضغوطات ايضا تزيد … و دوام الحال من المحال

    لازم نتقبل القليل من التغيير,… و تبقى المحبة بالقلب

  14. عيون الحب Says:

    هلا اخوي عثماني
    مساك الله بالنور والسرور

    ترى انا هذا اللي اقوله بعد
    الزمن يغير .. ويغير اشيا كثيرة معاه
    واللي في القلب يظل في القلب

    بس مين اللي يقدّر ويفهم؟

    سعييدة جدا بزيارتك اخوي
    ولا تحرمنا🙂

  15. Alfajer alba3eeed Says:

    ياما مرينا بهالمواقف.. وياما ناس نست العشرة..

    وانا صارلي موقف.. ويا اعز رباعتي.. بدون سبب هي بصوب وانا بصوب.. والسبب مجهول!!!

    بس لين الحين الهدايا والصور والبطايق موجوده عندي.. ودي احرقها والا اردلها اياهن .. بس بالنهاية هي ذكريات ما اقدر افرط فيها..

    ولي فترة بسيطة وانا احاول اعرف سبب التغير.. بس في النهاية
    NO ONE DESERVE!!!!!

    انا حاولت وايد.. اذا هي بترد حياها الله بس انا اتوقع كل محاولاتي بتتوقف لان ماشي فايدة ..

    بس ياريت لو تردين وياها مثل ماكنتوا.. ولاتخلون الدنيا تبعد مابينكم ..

    بوست حلو الغلا لاهنتي…

  16. عيون الحب Says:

    الفجر البعيد
    هيه والله كثير من تنسى العشرة هالايام
    تصدقين بعد مرة استوى فيني نفس الشي
    ولين يومج هذا ماعرف السبب

    بين انج تحرقينها او تردينها
    انا اشوف الحرق وقعه اهون علي من انه ربيعتي ترد لي كل هداياي
    بس احسن شي انج ما تفرطين فيهم

    شوفي اللي شراج اشتريه واللي يبيعج بيعيه
    انتي سويتي اللي عليج والباقي عليها

    الخلاف ماسبب قطيعة بينا الحمدلله
    بس النفوس اشوي يمكن مب راضية🙂

    الأحلى مرورج الغالية🙂

  17. Mishari Says:

    اللى ما يصون الصداقة مو كفو الواحد يتعب عليه
    🙂 تحياتى

  18. عيون الحب Says:

    مشاري
    والله صدقت

    حياك الله ولا تحرمنا🙂

  19. Harmony Says:

    مساء الخير
    الصراحة أول مرة أدخل مدونتج واستوقفني هذا الموضوع
    أنا شخصيا أحب جمع الأشياء التي تحمل معها الذكريات مهما كانت صغيرة, صحيح أنها مادية كما ذكر أحد الاخوة ولكنها تحمل الكثير من المعاني الحسية الثمينة التي لا أتخيل أنني أستطيع أن أتخلى عنها مهما كانت مؤلمة
    أما بالنسبة لنقطة تغير الشخص بعد مدة زمنية فإني أوافقك الرأي تماما, فشخصيا قبل أيام التقيت باحدى صديقات الدراسةالتي كانت تجمعنا علاقة قوية ولكن لأسباب غير مقصودة انقطعنا انقطاع شبه تام لمدة 3 سنين, فكنت سعيدة بهذا اللقاء و أنتظره بفارغ الصبر ولكن للأسف لم تكن كما كانت قبل 3 سنوات فاتسم لقاءنا بالبرود والرسمية التامة
    العبرة التي استخلصتها هي في الوصال وأهميته في تقوية العلاقة حتى ولو بكلمة واحدة فإنها كالماء الذي يسقي الزرع

    مع التحية

  20. عيون الحب Says:

    هلا والله
    حيا الله بنت بلادي

    مساج الله بالنور عيوني
    وسعيدة بزيارتج اللي ما أتمنى تكون الاخيرة

    جمع الذكريات والاحتفاظ بها شي غالي ويحمل من المعاني اشياء كثيرة

    صح يعني 3 سنوات مب اشوي
    وهالفترة كثير امور صارت ماشاركتيها اياها

    بس غريبة ليش هالبرود؟
    انا التقيت اليوم بوحدة من 9 او 10 سنوات مب شايفتها ولا اعرف اخبارها
    بس سولفنا مع بعض عادي واستانست اني التقيت بها

    وصدقتي الوصال كالماء الذي يسقي الزرع والله

    حياج الله عيوني
    وتأكدي اني بانتظار زيارات أخرى🙂

التعليقات مغلقة.


%d مدونون معجبون بهذه: