«
»

:: حب .. قريب .. غريب ::

By عيون الحب

.. يدق هاتفها .. رقم غريب
.. ترد ألو .. المتصل يركض في ردهة المشفى
.. إلحقي ولد عمج صارله حادث .. وطالب يشوفج
.. هي: يشوفني ؟! أنا ؟! اوكي دقايق واكون عندك.. في السيارة .. وفي خلجات نفسها
.. ياربي شو يبي فيني؟؟ معقولة؟؟ لا لا تستهبلين
.. أنا من سنين مب شايفته ولا شايفني مب معقول

.. وصلت المستشفى .. في غرفة الانتظار بجوار غرفة العمليات
هي: عسى ماشر أحمد .. شو صار على محمد؟
أحمد: كان يسوق مسرع وماقدر يسيطر عالسيارة وانقلبت فيه
هي: الله يهداه يارب
أحمد: بس هو طول الوقت ينادي باسمج .. كلمتيه قبل ولا شي؟
.. هي: أحمد شو هالكلام .. انت تعرف اني ما اكلم عيال عمي ولا شي
أحمد: ترى هذا اللي مستغربه يا أختي .. ليش طالبج انتي بالذات؟

.. في غرفة الافاقة

!محمد: طيف .. طيف .. دكتور اريد طيف

الدكتور: مين طيف؟ خل اشوف اذا احد ينتظرك برع.. في غرفة الانتظار

الدكتور: في احد اسمه طيف هني؟ تعرف محمد؟
طيف: هيه انا طيف .. عسى ماشر دكتور محمد فيه شي؟
.. الدكتور: يطلبج يقول يبي يكلمج
احمد: روحي شوفيه ياطيف
طيف: بروحي؟
.. أحمد: روحي يمكن شي في خاطره يبي يقوله لج

.. في غرفة الافاقة

الدكتور: اخليكم على راحتكم بس لا تجهديه بالكلام
طيف: ان شاء الله
محمد: طيف .. وينج ياطيف؟
طيف: حمدلله ع السلامة يامحمد .. زين جي تسوي في عمرك؟
.. محمد: طيف قربي خل اقولج شي بقلبي من زمان
.. طيف .. انا من زمان أحبج .. وقلبي كله ينبض بحبج
.. بس لأنج دايما ترفضين تقعدين معانا لما نزوركم
.. ودايما ترفضين تكلمينا لما نتصل
.. خفت يكون شخص ثاني في قلبج .. وخفت اعترف
.. بس انا والله احبج من لما كنا صغار

.. طيف: بس .. بس يامحمد لا تجهد نفسك وتعور قلبي معاك
.. انا ماسويت اللي سويته الا عشانك .. ماكنت اريد اقعد معاكم وارخص بعينك
.. ماكنت اريد اقعد مع عيال عمي واخذ واعطي معاهم فتشوفني بصورة غير
.. هم صح أهلي .. بس هم مايصير اطيح الميانه معاهم
.. أنا ماكنت اريد أكلم شاب غيرك .. ولا اضحك مع شاب غيرك
.. أنا ماكنت اريد عين تشوفني غير عينك .. واللي يرحم والديك لا تقول اكثر من جي
.. ارتاح وريحني معاك

.. محمد: آآآآآآآآآآآآه كيف ريحتيني الحين .. الحين انا كل شي إلتأم فيني
.. يعني طول هالفترة انتي تحبيني
.. يابختي فيج والله .. طيف .. احبج والله احبج .. نادي احمد بسرعة
.. أحمد (بعد مازقرته طيف): هلا محمد .. عساك بخير ان شاء الله
.. محمد: تعرف انك صديق عمري .. وبالرغم من كذا مافتحتلك قلبي
.. خفت من اللي اقوله يخرب على علاقتنا ببعض
.. الحين اقدر افتحلك اياه واقول .. اني احب اختك طيف .. وطالب القرب منكم::
::
::
::

.. في الحقيقة قد تحدث أمور مثل هذي .. يكتم كل منهما حبه
.. ومن يعلم هل سيكون المصير باللقاء ام الفراق
.. أذكر مرة قالتلي ربيعتي عن سياسة يتبعونها اهلهم .. من اخوان واعمام وخوال
.. لما يجي شخص يخطب عند احد من بناتهم
.. يجمعون عيال العايلة كلهم ويخبرونهم انه فلان تقدم لفلانة
يعني كأنهم يقولون في احد له رغبة في البنت ولا نزوجها؟؟
.. بالرغم من انه احيانا تطلع البنت بصورة مب حلوة كأنها سلعة تنباع بالسوق لوول

..او بمزاد علني
.. بس على الأقل حتى لو كانت تحس باحساس تجاه احد منهم
.. تتأكد ساعتها انه هالاحساس مب متبادل وقد يكون وهم
وفي نفس الوقت الشاب مايكون خسر بنت عمه او بنت خاله اذا كان رايدها :) ::
::

.. رايكم بالقصة
ورايكم بسياسة العايلة؟
واخيرا لو هالسياسة مب موجودة .. كيف بيلتم شمل هالبنت بهالشاب؟

تم إدخال هذه البيانات في في يوليو 10, 2007 في 3:23 م وهي متضمنة تحت دنيا غير شكل, رأي ونقاش. يمكنك متابعة الردود على هذه التدوينة من خلال الخلاصات 2.0 جميع التعليقات مقفلة حالياً

15 تعليقات إلى “:: حب .. قريب .. غريب ::”

  1. 7osen يقول:
    يوليو 10, 2007 عند 4:07 م

    قصة حلوه

    لكني أعتقد أن الإنسان اللى يحب يكون باين عليه

    يعني لما الأثنين يحبون بعض حتى لو مو قايلين لبعض راح يكون هذا الشي واضح عليهم ومبين في عيونهم

    اذا كان الحب متبادل

    راح يعرف الأثنين أنهم يحبون بعض

    أما سياسة العائلة
    فهي عرف أو عادة منتشرة في بعض مجتمعاتنا الخليجة وحتى العربية

    أنا أشوفها أنها تحط من قدر البنت
    وأنها سياسة خاطئة

    ودمتي بكل الخير

    بوست مميز

  2. عيون الحب يقول:
    يوليو 10, 2007 عند 4:12 م

    الأحلى مرورك اخي العزيز ..
    بس اذا الخجل عامل اساسي ..

    وابد ما يلتقون كيف بينعرف هالحب؟
    والخوف من انه الشعور من طرف واحد وقابل للرفض؟؟

    ساعته صعب الواحد يعترف بحبه ..

    هي تحط من قدر البنت بصراحة ..
    وأنا ما أشجع تصير بهالطريقة ..

    والمميز حضورك بعد طرحي للموضوع بدقائق لوول :)

  3. ادب يقول:
    يوليو 10, 2007 عند 6:31 م

    والله قصه حلوة مرره

    بس والله مشكله ما يكلم بنت عمة الا بعد الحادث

    ما فيها شي لو كلمها بالتلفون وقال انا ابي اتزوجك او ارسل اختة تجس النبض ما فيها شي

    احسن من ترخس نفيها البنت وتل\كلم الجميع عشان واحد ممكن يكون مو لمها..

    تقديري

  4. عيون الحب يقول:
    يوليو 10, 2007 عند 9:56 م

    أدب ..

    حياك الله اول شي في مدونتي ..
    ومرورك هو الاحلى اخوي ..

    تعرف انه ولد خالتي لو اتصل علي ..
    الخوف يتملكني من راسي الى اخمص قدمي؟

    فما بالك لو قالي والله رايدج زوجة لي ؟؟
    أما جس النبض واردة ..
    بس الحياء بعد عامل ..

    وصحيح كلامك كله ولا تطلع البنت رخيصة في عين اللي يبيها ..

    احترامي

  5. عابر سبيل يقول:
    يوليو 11, 2007 عند 4:10 ص

    أنا أرى أنه لو كان لأحد رغبة في فتاة
    سواء قريبته أو غير ذلك

    فعليه أن يتقدم بأسرع وقتن
    أو على الأقل يلمح

    حتى لا يزعل إذا راحت عليه حبيبة القلب !

    مع ذلك تبقى هناك أمور تمنع الإنسان من فعل ذلك
    لكن عليه أن لا يتألم كثيرا في النهاية
    لأن ذلك قدر الله

  6. loco يقول:
    يوليو 11, 2007 عند 7:35 ص

    wayeed wayeed mo2athera el qeesa !

    bas feeha noo3 min el drama el 5aleejya ely ma en7eebha ( wa sorry 3ala el keelma )

    lazeem e9eer wafat aw 7adeeth aw shay 7azeen 3alashan en6ale3 ely eb qabna lish ? mo shar6 ! etha kan fee 7oob mo lazeem yen5aash !wa thany shay ohwa lo e7eeb 9eej chan 5a6ab qabeel mo egol a5af fee wa7eed eb qalbeech ! mala da3y keeleesh ! wel nahaya ana akameelha leeech ( ra7 emoot mohamad wa ra7 teq3ad 6eef tet7aser 3aeeh wa etgool yaleet ma galy walla sheefta ) hathy ehya el nehayat EL 5ALEEJYA

  7. Shaima'a Alkandari يقول:
    يوليو 11, 2007 عند 9:07 ص

    قصه جميله وتلامس واقعنا

    بس ليش توه يتكلم وينه من زمان ليش توه يعلن لها عن شعوره

    الحب موعيب ولا شي يعني شعور حلو

    سياسه في ناس يتبعونها وفي |لأ

    بس بالنهايه بيكونون لبعض

    بس غلطته انه ماتقدم لها من زماان

    يعني لو مو الحادث جان ماتحجى بعد

  8. عيون الحب يقول:
    يوليو 11, 2007 عند 11:31 ص

    عابر سبيل ..

    صحيح كلامك هذا المفروض ..
    ولكن احيانا الواقع احيانا يجبرنا على اشياء مانبغيها ..

    حياك الله اخوي ..

    ::
    ::

    لوكو ..

    هههههههههههههه صح كلامك ..
    ترى انا كنت بقول انه بيموت ..
    بس لما اذكر اني اقرا قصة نهايتها كذا انقهر فما حبيت اقهركم ..
    فخليتها مفتوحة لوول ..

    وصح مب شرط حدث يصير عشان احد يعترف بالحب .. بس هذا اللي صار لوول ..

    وكلامك ابد ما يزعل وحياك الله :)

    ::
    ::

    شيوم ..

    الاجمل مرورج والله ..
    احيانا الوقت مايسعفج ..
    واحيانا تسوين اشياء وتتحسفين لانج ماسويتيها قبل ..
    مرورج اسعدني وحياج الله دائما :)

  9. سأألم الامـــارات يقول:
    يوليو 11, 2007 عند 11:32 ص

    انا ما قريت القصه بس سويتلها سكان
    مختصر الموضوع نفس هاي القصص ماتستوي الا بالافلام الهندية !!!؟

    حتى الافلام العربية ماتسوي جي !؟
    هالنوع من الحب كان موجود قبل 20 و 15 سنه ….حب الحين تغير وطبيعة العلاقات تغيرت !؟
    انا اتكلم من واقع والله
    قبل اذا حبيتي انسان ممكن تكتمين حبج في قلبج وتحسون ببعض بالعيون او بالابتسامات
    بس الحين لازم اتجوفينه وتتعرفين عليه اكثر من مجرد نظرات !؟ وهذا الواقع …واي واحد مايعترف فيه يكون مب عايش بالواقع الي مجتمعاتنا فيه

    زمن الحب مايتحصل الحين …الحب يباله صدق واخلاص
    للاسف هذا الشي مايتحصل الحين …!؟

    تحياتي

  10. عيون الحب يقول:
    يوليو 11, 2007 عند 12:17 م

    هههههههههههه
    بصراحة علقت ماعرفت شو اقول لوول..

    اوكي صح كلامك .. يمكن حب قبل غير عن حب الحين ..
    بس مب معناته اني اتجاوز حدودي واسوي قصة حب وغرام قبل علاقة تربطني فيه ..

    وصح الحب الحين صار اصعب من قبل بس مب معناته مش موجود ..

    تفاءل بالخير بروو ..
    وهدي اعصابك لوول :)

  11. امبراطـــورة اشعاري يقول:
    يوليو 11, 2007 عند 7:34 م

    مساء الحب يا احلى عيون الحب..

    قصه روووووووعه

    حلاة الحب لما يكون بين شخصين انه مايكون مخفي بالعكس لازم يبينون لبعض ولو بالتلميحات انه كل واحد منهم منجذب للثاني

    يعني مثل سالفة محمد وطيف لو ان محمد مات ماكانت طيف تدري انه يحبها بالعكس راح تقول مات واهو مايدري بعد اني انا احبه

    بس الحمدلله انكتب له عمر واشهر حبه لها :) )

    اما سياسة العائله تجاه الزواج..

    هذه تعتبر من التقاليد اللي متمسكين فيها اكثر العوائل

    انهم يعتبرون البنت من نصيب ولد العم واذا فيه احد يبيها لازم بالاول تنعرض على ولد العم اذا له خاطر فيها

    معتبرين البنت مثل ماقلتي سلعه تباع وتنشرى

    بس الرسول “ص” يقول : من اتاكم من ترضون دينه وخلقه فزوجوه..

    والله كريم ^_^

  12. عيون الحب يقول:
    يوليو 12, 2007 عند 5:45 ص

    الأروع مرورج عزيزتي ..
    وصح حلاته لما يظهر وينقال ..
    قبل مايفوت الفوت ..

    حليلنا والله ..
    والله كريم ..

    حياج الله :)

  13. فتاة الحزن يقول:
    يوليو 12, 2007 عند 11:05 ص

    في ناس هكذا تنتظر إلى ان تضيع الفرصة …
    وبخاصة إذا كانوا جافين المشاعر..
    أو محرم عليهم البوح بهذا النوع من المشاعر..
    وفي ناس يكون بقربهم الحب وهم يعرفون ان هناك من يحبهم ويعلمون انه صادق..
    ورغم هذا يجرحونه ويفرطون به ولكن عندما يغيب يحاولون استرداده بشتى الوسائل..

    أما سياسة العايلة اعتقد إنها صائبة رغم أنها مو حلوة..
    على الأقل ما تقعد البنت عانس وتعرف إنه لها نصيب..

  14. ~ مذهلة ~ يقول:
    يوليو 12, 2007 عند 2:12 م

    يوه ما احب السيكوت
    ليش ما يصارحون بعض صح انها صعبه بس فيه كم طريقه

    وسياسة هالعائله معقوله نوعا ما
    بس كل شي ولا السكوت
    إذا فات الفوت ماينفع الصوت

    لكـ وديـ

  15. عيون الحب يقول:
    يوليو 12, 2007 عند 6:43 م

    فتاة الحزن ..

    في النهاية الناس اطباع واجناس ..
    والسياسة حتى انا اشوف بالرغم من صعوبتها الا انها لها ضمانات ..

    سعيدة بزيارتج وحياج الله دايما :)

    ::
    ::

    مذهلة ..

    الظروف احيانا تجبر الانسان عالسكوت ..
    وعن السياسة انا بعد اقول معقوله ..

    حياج الله عزيزتي ولا تحرمينا :)

التعليقات متوقفة